Láıli Aıtjanqyzy M.Ospanov atyndaǵy Aqtóbe medısına akademııasyn 2004 jyly akýsher-gınekolog mamandyǵy boıynsha bitirip, ınternatýradan soń týǵan jerine oraldy. Jastyń bári qalaǵa aǵylǵan sol jyldary ol aýyldy, aýyl bolǵanda da oblys ortalyǵy Aqtaýdan 500 shaqyrym jerdegi Beıneýdi tańdady. Aýdandyq aýrýhananyń qatardaǵy dáriger-
liginen bastap, bala týý bóliminiń meńgerýshisine deıin kóterildi. Jas maman boıyndaǵy qýat-qabiletin el isine nege jumsamasqa degen maqsatpen aýdandyq máslıhattyń depýtaty da boldy. Beıneýde tabandaǵan on jyl eńbek etken L.Ájibaeva tájirıbe jınap, ysylǵan soń Aqtaý qalalyq perzenthanasyna qyzmetke ornalasty.
Qazirgi tańda júkti, tolǵaǵy kelgen jáne bosanǵannan keıingi kezeńdegi áıelderge táýlik boıy akýsherlik shuǵyl bilikti medısınalyq kómek kórsetip, aýyr naýqastar men júkti áıelderge konsılıým ótkizedi. Árdaıym bilimin jetildirip, izdenip júretin maman qosymsha ÝZI apparatyna túsirý mamandyǵyn da ıgerip aldy. Qazir qalalyq perzenthanada ári akýsher-gınekolog, ári Ýzı mamany bolyp tynymsyz eńbek etýde. О́zi jas maman bolsa da, ózinen keıingi jastarǵa bilgenin úıretip, jıǵan tájirıbesin bólisetin aqylshy da. Aıtalyq, jas dárigerlerge ota tehnıkasyn úıretýden jalyqpaıdy. Láıli Aıtjanqyzynyń jumysqa tııanaqtylyǵyna sengen basshylyq oǵan dıagnostıkalaý, emdeý hattamalaryn qatań baqylaý jáne saqtaý qyzmetin júktedi.
– Ana men bala densaýlyǵy, olardyń ólimin boldyrmaý – bizdiń eń basty maqsatymyz. Ana da, sábı de – adam. Al adam, Konstıtýsııamyzda aıtylǵandaı, memleketimizdiń eń basty qundylyǵy. 2009 jyly oblys ákiminiń kaýlysymen 60 oryndy perzenthana Aqtaý qalasynyń júkti áıelderine jáne tolǵaǵy kelgen, bosanǵan áıelderge mamandandyrylǵan medısınalyq kómek kórsetý úshin ashylǵan bolatyn. Sol jyly jergilikti qarjylandyrý kómegimen atalǵan perzenthanada kúrdeli jóndeý jumystary júrgizildi. Qazirgi tańda perzenthana óz aldyna keshendi akýsherlik ǵımaraty bar, bes bólimnen turatyn úlken bosandyrý mekemesi. Bosanýshy áıelder sany jyldan-jylǵa artýda. Biz kelýshilerge tártipti, tazalyqty jáne dárigerlik mindettilikterdi saqtap, laıyqty jaǵdaı jasaýǵa tyrysamyz, – deıdi ekspert dáriger jáne akýsher-gınekolog, akýsherlik jáne gınekologııa mamandyǵy boıynsha 1 sanatty maman L.Ájibaeva.
Keshe ǵana Qazaqstan Respýblıkasy Ulttyq ekonomıka vıse-mınıstri Rýslan Dálenov Mańǵystaý oblysy respýblıkada bala týý kórsetkishi boıynsha kóshbasshylyq orynda kele jatqanyn aıtqan bolatyn. Tabıǵı ósim jáne kóship kelýshiler esebinen turǵyndar sany kúrt artqan óńirde ómirge kelip jatqan árbir sábıdiń kindigin kesip, «qarsy alyp» júrgen Láıli syndy akýsher-gınekologtardyń eńbegi zor.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
