Álemdik avto-dodanyń Mańǵystaýda ótýi, birinshiden, saıys úshin qyzyqty bolsa, ekinshiden, kıeli óńirdiń sulý tabıǵatyn, tarıhı oryndary men mádenıetin ózge elderge tanytýǵa jasalǵan múmkindik.
Mańǵystaýda ótken «Rallı Qazaqstan-2017» rallı-reıd Álem kýbogynyń besinshi kezeńi EKSPO-2017 kórmesiniń qurmetine oraılastyryldy. Qazaqstan Respýblıkasy Mádenıet jáne sport mınıstrligi, Mańǵystaý oblysynyń ákimdigi jáne elimizdiń Avtomotosport federasııasynyń uıymdastyrýymen ótkizilip jatqan saıysqa Qazaqstanmen birge, Saýd Arabııasy, BAÁ, Katar, Reseı, Ýkraına, Polsha, Lıtva, Germanııa, Chehııa, Belorýssııa, Nıderland, Slovenııa, Fransııa elderinen 25 ekıpaj, 50 sportshy qatysty.
Aldymen Aqtaý qalasynda teńiz jaǵalaýynda saltanatty ashylýy ótken saıys alty kezeńnen turdy jáne bir aptaǵa sozyldy. Barlyǵy 2494 shaqyrymdyq jarys jolynyń 1846 shaqyrymy jedel júrý aımaqtary boldy.
Temir tulparlardy tizgindegen sportshylar Kaspıı teńiziniń batys jaǵalaýyn boılaı júrip ótti. Keń dalany qoıý shańǵa orap, japanda quıyndata júıtkigen jarysta shyǵystaǵy rallı jarysynyń 12 dúrkin jeńimpazy, FIA Álem kýbogynyń jeti márte chempıony katarlyq avtoshabandoz Nasser Ál-Attııa bes kún boıy kósh bastap, osy avto-alamannyń jeńimpazy atandy. Jarystyń joǵary deńgeıde uıymdastyrylǵanyn, Qazaqstannyń, Mańǵystaýdyń erekshe áser etkenin aıtqan Nasser Ál-Attııa saıysta saǵatyna 180-185 shaqyrymǵa deıin júrip, barlyǵy 2200 shaqyrym joldy artqa tastaǵan.
Avto-alamandaǵy qazaqstandyq toptyń da jetistikteri jaman emes. Elimizdiń atynan alty komanda qatysyp, jalpy esepte 5-orynnan kórindi.
Qazaq dalasynda temir tulparlarmen saıysqa túsken kásibı sportshylar endi rallı-reıdti Italııa, Ispanııa, Vengrııa, Polsha, Marokko, Portýgalııada jalǵastyryp, bıylǵy jyldyń qazan aıyna deıin jarysqa túspekshi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
