Ostapenko – jańa juldyz
«Áıelder arasynda «Rolan Garrostyń» bıylǵy jeńimpazy kim bolýy múmkin?» degen suraq týyndaǵanda, kópshiliktiń oıy bir jerden shyqty. Sarapshylardyń basym bóligi de «úsh jyl buryn fınalda ketken eseni osy joly Sımona Halep qalaı da qaıtarýǵa tıis» degendi alǵa tartty. 2014 jyly jeńimpaz atanýǵa bir qadam qalǵan rýmynııalyq tennısshini Marııa Sharapova toqtatqan. Bul joly Halep Parıjte tolysqan tájirıbemen keldi. Eń bastysy, bıylǵy dodada syralǵy qarsylastary Serena Ýılıams te, Marııa Sharapova da joq. Onyń ústine tobyqqabynyń jaraqatyna qaramastan, 25 jastaǵy sportshynyń alǵashqy machtardaǵy senimdi jeńisi mamandar pikirine dálel bolǵandaı.
Fızıkalyq qana emes, moraldyq turǵyda da Sımona ózin úlken jeńisterge daıyn ekendigin baıqatty. Sózimizge tuzdyq retinde úshinshi aınalymdaǵy Darıa Kasatkınamen kezdesýdiń ekinshi partııasyn nemese shırek fınaldaǵy Ellına Svıtolovamen aıqasty aıtýǵa bolady. Ásirese, ekinshisinde 3:6, 1:5 esebimen utylyp turyp, match tizginin qolǵa alǵan Halep jartylaı fınalda da minez tanytty. Fınaldyń joldamasy sarapqa salynǵan dodada ol chehııalyq Karolına Plıshkovany qınalmaı utty. Osydan soń cheh tennısshisi sheshýshi synda Halepke bás tigetinin habarlaǵan.
Sımona týrnırdiń sońǵy kúninde matchty birqalypty bastady. Alǵashqy setti óz atyna jazdyrǵan rýmyn qyzy ekinshi kezeńde qarsylasyn – órimdeı Elena Ostapenkony eleń qylmaıtyndaı kórindi. Alǵashqy tórt geımde latvııalyq sportshynyń kósilýine esh múmkindik bergen joq. Bir saǵat boıy Elenanyń tájirıbesizdigin baqylaǵan rýmyn qyzy bosańsyp ketken sııaqty. Dál sol sátte tizginge Ostapenko ıelik ete bastady. Soqqylary myǵym, doptary dittegen jerine jetip jatyr. Aıaq astynan ne bolyp ketkenin túsinýden qalǵan Halep abdyrap qaldy. Quddy bar bilgeninen jańylǵandaı.
Úshinshi settiń basynda tepe-teńdik ornaǵandaı kóringen. Belsendilik tanytýǵa tyrysqan Halep esepte alǵa shyǵyp edi, latvııalyq tarazy basyn teńestirip qana qoımaı, tablodaǵy kórsetkishti 5:3-ke jetkizdi. Sońǵy geımde táýekelge barǵan Ostapenkonyń joıqyn soqqysyna Halep úlgere almady. Esep – 6:4, 4:6, 3:6. Elena – «Úlken dýlyǵa» jeńimpazy!
Bıyl Gýstavo Kýertenniń «Rolan Garrostaǵy» sensasııalyq jeńisine týra 20 jyl toldy. 1997 jyly brazılııalyq tennısshi Fransııaǵa attanǵanda reıtıngte alǵashqy 50 tennısshiniń qataryna da kirmegen. Bul týraly Gýstavonyń ózi: «Men Parıjge juldyzdardyń oıynynan lázzat alý úshin bardym. Eshteńeden úmit kútken joqpyn, bar-joǵy ár dop úshin kúrestim. Nátıjesinde jeńiske jettim», – dep eske alady. Ostapenkonyń oqıǵasy da osyǵan uqsas.
Osylaısha Ostapenko óziniń alǵashqy meıdjorinde top jarǵan birinshi tennısshi atanyp otyr. Endi buǵan Latvııanyń maqtanyshy degen ataq qosylary haq. Sebebi, ol – osy elden shyqqan tennısshilerdiń arasynda «Úlken dýlyǵa» týrnırin jeńgen tuńǵysh sportshy.
Qýanyshy qoınyna syımaǵan jeńimpaz «Sene alar emespin, Men «Rolan Garrosta jeńiske jettim! Jasym bar-joǵy 20-da bolsa da, «Úlken dýlyǵada» top jarǵanyma sene alar emespin!» – degendi ǵana qaıtalaı berdi. Al biz Elenaǵa bul seniń jeńisterińniń basy ǵana degimiz keledi.
Qumaıt korttyń Koroli
Erler arasynda basty kýbokqa talas «Rolan Garrostyń» toǵyz dúrkin chempıony Rafael Nadal men «Úlken dýlyǵanyń» úsh dúrkin jeńimpazy Sten Vavrınka arasynda órbidi. Bir qaraǵanǵa, Nadalǵa «basý» aıtar bir adam bolsa, ol osy Vavrınka sekildi kóringen. Bul – Vavrınkanyń «Dýlyǵadaǵy» tórtinshi fınaly. Osyǵan deıingi úsheýinde jeńis toıyn toılaǵan. Onyń ústine shveısarııalyqtyń bir utymdy tusy, osyǵan deıingi sheshýshi syndardyń úsheýinde de álemniń birinshi raketkalarynan basym túsken eken. Eki kún buryn álemniń úzdigin taǵy da qapyda qaldyrǵanyn aıttyq. Sondyqtan Steenniń topyraq tósenishtiń «korolin» taǵynan birjola taıdyrmasa da, shabýylda saýattylyq tanytyp, bekhendin júzege asyrýy arqyly 2015 jylǵy jetistigin qaıtalýyna múmkindigi bar edi.
Degenmen statıstıkalyq málimetterdiń ózi ıspan jigitiniń jaǵynda. Nadal bul Fransııa ashyq birinshiligine quralaqan kelgen joq. Basqa tabystaryn qospaǵanda, Parıj tórinde ol toǵyz ret óziniń myqtylyǵyn moıyndatyp úlgergen.
Al fınalǵa Rafa esh qınalmastan jetti. Birde-bir oıynshy ıspan jigitine laıyqty qarsylyq kórsete alǵan joq. Odan qaldy, bıylǵy maýsymda topyraq tósenishte ótken oıyndardyń barlyǵy ıspan jigitiniń paıdasyna sheshilip keldi. Tek Rımdegi «Mastreste» avstrııalyq Domınık Tımge jol bergen. Onyń ózinde sol esesin «Rolan Garrostyń» jartylaı fınalynda qaıtardy. Vavrınka bolsa alǵashqy bes matchyn úsh sette jeńgenimen, jartylaı fınalda Endı Marreı ońaı shaǵylar jańǵaq emestigin ańǵartty. Tórt saǵattan astam ýaqytqa sozylǵan osy kezdesýdi erler arasyndaǵy eń tartysty aıqasqa teńeýge ábden bolady.
Eki tennısshi ózara 18 ret kezdesip, sonyń 15-inde Rafa jeńiske jetken. Topyraq tósenishte Vavrınka bir ret – 2015 jylǵy maýsymda Rımde sheberlik jaǵynan basym tússe, «Rolan Garrostaǵy» match ıspanııalyqtyń paıdasyna sheshilgen. Sondyqtan osy joly Vavrınka teketiresip baǵady dep baǵamdadyq. Sóıtsek, «koroldiń» kózdegeni basqa eken.
Nadal fınaldyq oıyndy da joǵary deńgeıde bastady. Alǵashqy sette breıkti júzege asyra almaı qalǵan Stanıslas óz soqqylarynyń arqasynda tek eki geım aldy. Shveısarııalyqtyń bar kórsetken qarsylyǵy osy ǵana. Qalǵan tórt geımde Rafael birde-bir qatelik jasaǵan joq.
Al ekinshi jáne úshinshi setterde shıraq, jınaqy qımyldaǵan ıspanııalyq qarsylasyn qyspaqqa alýmen jalpy esepti 3:0-ge jetkizdi – 6:2, 6:3, 6:1.
2017 jylǵy maýsymda Nadal Monte-Karlo, Barselona men Parıjdi 10-retten baǵyndyryp, Madrıdte óziniń besinshi kýbogyna qol jetkizdi. Jasy 31-ge kelse de babyn joǵaltqan joq. Qaıta kúsheıgen ústine kúsheıip keledi. Orda buzar jastyń áseri bolsa kerek. Kortta sheber qımyldap, qatelikterge de boı aldyrmaýǵa tyrysady.
«Bári kúndelikti atqarylatyn jumysqa baılanysty. Men osymen 10-shy ret osy jerde jeńiske jettim. Bárine kóńilim tolady, muny quddy ǵajaıyp dersiń. Bul kún men úshin óte mańyzdy boldy. Jaraqatym, aýyr kezeńder az bolǵan joq. Sonyń bárinen ótip qaıta úlken jeńiske jetkenime sheksiz qýanyshtymyn. Ár aptadan, ár oıynnan lázzat alamyn. Osy baǵytta jalǵastyrýdy kózdeımin», – dedi Nadal jeńisinen soń bergen suhbatynda.
Bul nátıje onyń ATR reıtınginde 2-orynǵa kóterilýine sebep boldy. Endigi maqsaty – reıtıngte de úzdik ataný. Osy qarqynynan taımasa, ol kún de alys emes.
«Rolan Garrostyń» juptyq syndarynda da jeńimpazdar anyqtaldy. Áıelder arasynda, mamandar boljaǵandaı, Betanı Mattek-Sends pen Lıýsı Shafarjova dýeti jeńis toıyn toılady. Fınalda Eshlı Bartı men Keısı Dellakýany 6:2, 6:1 esebimen utyp, qatarynan úshinshi «Dýlyǵaǵa» ıelik etti.
Mádına ASYLBEK,
jýrnalıst
ASTANA
