Jyl saıynǵy áskerı-patrıottyq jastar jıynyn ótkizýdiń negizgi maqsaty áskerı qyzmetti nasıhattaý, Qazaqstan Respýblıkasy Qarýly Kúshteriniń ımıdjin arttyrý, ártúrli elderdiń jas armııashylary birlestikteri arasyndaǵy yntymaqtastyqty nyǵaıtý bolyp tabylady.
Bıyl atalmysh áskerı-patrıottyq jıyn alǵash ret Halyqaralyq deńgeıde, Reseı Federasııasynan kelgen komandanyń qatysýymen ótkizilgeli otyr. Sondaı-aq, jıyn baqylaýshysy retinde О́zbekstannan arnaıy qonaqtar shaqyrtylǵan.
Bıylǵy jyly jıynǵa 600-den asa qatysýshy qatysýda. Olardyń qatarynda respýblıka óńirlerindegi áskerı-patrıottyq klýbtardyń tárbıelenýshileri, Astana, Shymkent, Almaty, Qaraǵandy qalalaryndaǵy «Jas ulan» respýblıkalyq áskerı mektepteriniń, «Arystan» mamandandyrylǵan lıseıiniń, Pavlodar qalasyndaǵy áskerı mektep-ınternatynyń, Semeı qalasyndaǵy mamandandyrylǵan «Jas ulan» er balalar mektebiniń tárbıelenýshileri jáne Reseı Federasııasy Orynbor prezıdenttik kadet ýchılıshesiniń tárbıelenýshileri bar.
«Aıbyn» jastar jıyny maýsymnyń 13-i men 17-i aralyǵynda tórt kúnge sozylady. Jıyn baǵdarlamasyna «Bilimdar» zııatkerlik oıyny, óz jetistikteriniń kórmesin ótkizý, óńirler men oqý oryndarynyń tanystyrý rásimi, robotty tehnıka boıynsha «Meniń robotym» baıqaýy, áskerılendirilgen kross, arqan tartý, pnevmatıkalyq vıntovkadan oq atý, «Aıbyn daýysy» festıvaliniń mega-arty, peıntboldy komandalyq quramda oınaý, áskerılendirilgen estafeta jáne «World of tanks» kompıýterlik oıyny engizildi. Jıyn barysynda balalar biregeı daıyndyq mektebinen ótip, qazaqstandyq armııanyń zamanaýı tehnıkasy men qarý-jaraǵyn tamashalap, ózderiniń kúshteri men múmkindikterin synap kóredi. Sondaı-aq tájirıbe jınaqtap, jańa dostar tappaq.
Mıras Asan,
«Egemen Qazaqstan»
Qaraǵandy oblysy.
