Úzdik fransýz kompanııalary men startap ókilderiniń basyn qosqan alańda energııany únemdi paıdalanýdyń ınnovasııalyq tehnologııalary tanystyryldy.
EKSPO-2017 halyqaralyq kórmesindegi Fransııa pavılonynyń bas komıssary Paskal Loro energııa óndirisin ońtaılandyrý boıynsha ázirlengen pavılonnyń taqyryptyq bólimderin aralaı júrip, tanystyryp shyqty. Qoqys qaldyqtaryn jınaý jáne qaıta óńdeýmen aınalysatyn Sytcom memlekettik agenttigi qoqystardy suryptaýdyń jańashyl ıdeıalaryn usynyp otyrǵanyn túsindirgen bas komıssar sırkýlıarlyq ekonomıka mańyzymen sabaqtastyrdy.
– Qazaqstan men Fransııa saıası, ekonomıkalyq, strategııalyq josparlar aıasynda tyǵyz qarym-qatynasta. EKSPO-2017 kórmesi aıasynda óz pavılonymyzdy tanystyryp otyrǵanymyzǵa óte qýanyshtymyz. О́zderińiz kórip turǵandaryńyzdaı Fransııa pavılony birneshe taqyryptyq zonaǵa bólingen. Atap aıtqanda, ekoqala, bolashaq energııasy, ekologııalyq kólik salalary boıynsha belgili fransýz ónerkásibiniń kóshbasshy kompanııalary sońǵy tehnologııalyq jańalyqtaryn usynady, – dedi Paskal Loro.
1955 jyldan beri elektr kóligin damytýdy qolǵa alǵan PEUGEOT kompanııasy kórme qonaqtaryna jınalmaly samokat, elektroskýter, elektrovelosıped syndy ekologııalyq kólikterdiń sońǵy jetistikterin tanystyrdy.
Qorshaǵan orta máselelerin retteýde mańyzdy ról atqaratyn Fransııa sońǵy jyldary elektr kóligin jappaı qoldanysqa engizýde belsendi jumys istep keledi. 2015 jylǵy málimet boıynsha, Fransııada 5 myńnan astam elektr beketi jumys isteıdi.
Aıa О́MIRTAI,
«Egemen Qazaqstan»
