Tamara Dúısenovanyń aıtýynsha, Qazaqstanda áıelder eńbegin paıdalanýǵa tyıym salynǵan 25 jumys qamtylǵan tizim qoldanysta. Olardyń ishinde metall óńdeý, qurylys, taý-ken, metallýrgııalyq jumystar, sement óndirisi bar. Tizimde áıelder eńbegin paıdalaný tyıym salynǵan 287 asa zııandy, qaýipti jáne aýyr mamandyq qamtylǵan. Máselen, asfaltbetonshy, metall quıýshy, qazandyqshy, býldozer, kran mashınısti, sýǵa súńgýshi, jol monteri, elektr monteri.
«Biz bul tizimdi jyl saıyn jańartyp otyramyz. Qazir áleýmettik áriptesterimizben jáne Qazaqstannyń isker áıelder qaýymdastyǵymen birlesip bul máselege qaıta oralýdy jón kórdik. Tehnologııalyq prosesterdiń engizilýine oraı keıbir óndiris túrleri adam densaýlyǵyna keri áserin tıgizbeı jumys isteýine múmkindik beredi», - dedi mınıstr.
2017 jyldyń sońyna qaraı tizimdi ońtaılandyrý boıynsha naqty usynystar ázirlenedi. 2016 jyldyń qorytyndylary boıynsha QR Eńbek jáne halyqty áleýmettik qorǵaý mınıstrligi eńbek qatynastarynda ózin-ózi retteý prınsıpi jumys isteıdi dep tujyrymdady.
«2015 jylmen salystyrǵanda, ótken jyly bizde jasalǵan jeke eńbek kelisimsharttarynyń sany 60 myńǵa artty», - dedi Tamara Dúısenova.
Sonymen qatar,elimizdegi barlyq iri jáne ortasha kásiporyndar ujymdyq kelisimsharttarmen qamtylǵan. «Búginde 88% iri, 90% ortasha jáne 31% shaǵyn kásiporynnyń ujymdyq kelisimsharttary bar. Bul - jumysshylar ókilderi men jumys berýshilerdiń áriptestiginiń nátıjesi», - dedi mınıstr.
