Úkimetaralyq komıssııanyń otyrysynda taraptardyń «Baıqońyr» kesheniniń qyzmetindegi ózekti máselelerdi sheshýine múmkindik beretin, «Baıqońyr» keshenindegi ári qaraıǵy yntymaqtastyq Tujyrymdamasyn iske asyrý jónindegi sharalar talqylandy. Taraptar «Baıqońyr» ǵarysh aılaǵynyń ınfraqurylymyn damytýǵa jáne qoldaýǵa baǵyttalǵan birikken is sharalardy qabyldaýǵa, «Báıterek» ǵaryshtyq zymyran keshenin qurýǵa ýaǵdalasty.
– Bizdiń aldymyzda turǵan ortaq mindet-ǵarysh salasyndaǵy Qazaqstan men Reseı arasyndaǵy yntymaqtastyqty tereńdetý jáne jalǵastyrý. Ýaqyt óte kele Baıqońyr zymyran isi salasyndaǵy mamandardy daıarlaıtyn naǵyz tehnopolıske aınalady, – dep atap ótti D.Rogozın.
– «Baıqońyr» kesheniniń tıimdi qyzmetin uıymdastyrý jónindegi birlesken jumystar eki eldiń ǵarysh salasyn damytýǵa, «Baıqońyr» ǵarysh aılaǵyndaǵy ǵaryshtyq qyzmettiń álemdik naryqtaǵy zamanaýı ári básekege qabilettiligin saqtap qalýǵa baǵyttalǵan, – dedi A.Mamın.
– Sondaı-aq, jıynda Baıqońyr qalasyn birlesip damytýdyń 2017-2025 jyldarǵa arnalǵan Baǵdarlamasynyń jobasy pysyqtaldy. Onyń iske asýy jalǵa berý jaǵdaıynda qalanyń ınjenerlik jáne áleýmettik ınfraqurylym nysandaryn damytý arqyly jańa áleýmettik, mádenı, turǵyn úı jáne óndiristik nysandardy qurýǵa, ınvestısııa jáne bıznes tartýǵa, qoljetimdi baspana qurylysyn salýǵa, shaǵyn jáne orta bıznesti damytýǵa yqpal etedi. Komıssııa otyrysynda Baıqońyr qalasyn damytýdyń qazaqstandyq taraptan qarjylandyrylý tártibi bekitildi. Osylaısha, qalanyń damýyna qos tarap ta qatysatyn boldy. Bul ınfraqurylym nysandaryn, atap aıtqanda, ábden tozyǵy jetip eskirgen jylý jáne sý júıelerin jańǵyrtýǵa múmkindik beredi. Qabyldanǵan sheshimder qalany tabıǵı gazǵa qosý boıynsha qolǵa alynǵan jumystardyń aıaqtalýyna da oń yqpal etpek. Jyl aıaǵyna deıin turǵyn úılerdiń alǵashqy legin kógildir otynǵa qosý, gaz tarıfin tómendetý josparlanǵan.
Sonymen qatar, jıynda «Baıqońyr» ǵarysh aılaǵynyń qyzmetkerlerine, Baıqońyr qalasynyń, Tóretam jáne Aqaı kentteriniń turǵyndaryna medısınalyq qyzmet kórsetýdiń, onyń ishinde Baıqońyr qalasynda turatyn Qazaqstan azamattaryna Qazaqstan Respýblıkasynyń ulttyq zańnamasyna sáıkes, QR densaýlyq saqtaý sýbektileriniń medısınalyq qyzmet kórsetý tártibi, sondaı-aq olardyń mindetti áleýmettik medısınalyq saqtandyrý júıesinen dárigerlik kómek alýy týraly ekijaqty qujatty osy jyldyń 3-toqsanynda qabyldaýdy jedeldetý jóninde sheshim qabyldandy.
«Baıqońyr» kesheniniń máselelerin talqylaý Astana qalasynda Premer-Mınıstr Baqytjan Saǵyntaevtyń tóraǵalyǵymen ótken keńeste jalǵasty.
