«Shyǵarmashylyq doda Qazaq ulttyq óner ýnıversıtetiniń, P.I.Chaıkovskıı atyndaǵy Máskeý memlekettik konservatorııasy men Astana qalasy ákimdiginiń qoldaýymen uıymdastyrylady. Baıqaý 17 jasqa deıingi mýzykanttar arasynda fortepıano, skrıpka, vıolonchel mamandyqtary boıysha ótkiziledi. Sharanyń ashylý saltanaty 15 maýsym kúni «Astana Opera» tetarynyń Úlken zalynda bolady. Konkýrstyq tyńdaýlar QazUО́Ý-iniń Organ zalynda jáne QazUО́Ý-iniń Jabaev atyndaǵy zalynda 16-24 maýsym aralyǵyna josparlanǵan», dedi baıqaýdyń kórkemdik jetekshisi – Qazaqstan Respýblıkasynyń Halyq ártisi, QazUО́Ý rektory Aıman Musaqojaeva.
P.I.Chaıkovskıı atyndaǵy H Halyqaralyq jas óspirimder baıqaýynyń qazylar alqasy quramyna keletin bolsaq, olardyń ishinde Reseı, Qazaqstan, AQSh, Japonııa, Koreıa, Qytaı, Vetnam, Fransııa, Shveısarııa, Vengrııa, Fınlıandııa jáne basqa elderdiń ataqty mýzykanttary men mádenıet qaıratkerleri bar.
Spıkerdiń sózinshe atalymdar boıynsha qazylar alqasynyń tóraǵalaryda osal emes. «Fortepıano» atalymy boıynsha – Vladımır Ovchınnıkov, «skrıpka» nomınasııasyna – Vıktor Tretıakov, «vıolonchel» atalymynda – Sergeı Roldýgın qazylyq etedi» dedi ol.
Sonymen qatar, jas mýzykanttardyń ónerin Máskeý konservatorııasynyń professorlary Valerıı Pıaseskıı men Iýrıı Slesarev, Borıs Andrıanov pen Kırıll Rodın, Sergeı Kravchenko men Edýard Grach, QazUО́Ý-iniń professorlary Nurlan Izmaılov pen Gúljámılá Qadyrbekova, sondaı-aq qazylar alqasynyń múshesi Laslo Mezo (Vengrııa), IýrgısDvarıonas (Lıtva), Fransısko Krýz Plaza (Italııa), Nam Iýn Kım (Koreıa), AkıkoTasýmı (Japonııa), Marttı Roýsı (Fınlıandııa) baǵalaıdy.
A.Musaqojaevanyń málimetinshe bıyl qazylar alqasy quramyna alǵash ret jas mýzykanttar, ótken jylǵy baıqaý jeńimpazdary Anastasııa Ýshakova men Donghıýk Kım kirgen.
Sonymen qatar, aqtyq márege jetken qatysýshylar Eýrazııalyq sımfonııalyq orkestri men QazUО́Ý-iniń sımfonııalyq orkestriniń súıemeldeýimen óner kórsetedi.
Spıkerdiń sózinshe baıqaýdyń baǵdarlamasyna qazylar alqasynyń sheberlik synyptary men konsertteri engizilgen. «Olardyń biri – Kırıll Rodın men Borıs Andrıanovtyń qatysýymen Natalııa Shahovskaıany eske alý konserti» dedi A.Musaqojaeva.
Baıqaýǵa 20 elden, Reseı, Qazaqstan, Qytaı, Koreıa, Japonııa, Amerıka Qurama Shtattary, Mońǵolııa, О́zbekistan, Germanııa, Italııa, Izraıl, Ulybrıtanııa, Meksıka jáne basqa elderden 120 jas oryndaýshy qatysatynyn aıta ketsek deımiz.
Baıqaýdyń uıymdastyrýshylary P.I.Chaıkovskıı atyndaǵy Halyqaralyq baıqaý laýreattarynyń qaýymdastyǵy jáne Qazaqstan Respýblıkasy Mádenıet jáne sport mınıstri. Sharanyń jabylý saltanaty men laýreattar konserti 25 maýsym kúni «Qazaqstan» OKZ-da óte dep josparlanǵan.
Raýan QAIDAR,
"Egemen Qazaqstan"
