Qos boksshynyń arasyndaǵy jekpe-jek ótetini resmı túrde habarlanǵan soń ásirese, meksıkalyqtar men AQSh-tyń ózge qalalarynan keletin amerıkalyqtar jergilikti qonaqúılerge aldyn ala bron jasaýdy qazirden bastap qolǵa aldy. Bul kezdesýdi arenada otyryp kórgisi keletin qazaqstandyq jankúıerlerdiń joq emestigi belgili. Osyǵan oraı, Qazaqstan týrıstik fırmalarynan Golovkın-Alvares jekpe-jegine qazaqstandyq jankúıerlerdiń qansha qarjy jumsaıtynyn surap bilip edik.
OASIS-1 týrıstik fırmasy eki kúnge arena qasyndaǵy úshjuldyzdy qonaq úıdi jáne boks keshiniń eń arzan bıletin qarastyrǵan. Jalpy quny 2500 dollardy quraıdy.
Al Atlas Travel Agency qyzmeti ózgelerine qaraǵanda qymbatyraq – 4000 dollar. Biraq bir erekshelegi týrıster Las-Vegastan bólek Ystanbul, Chıkago qalalaryn aralap shyǵýyna múmkindik jasaıdy.
Travel Express týrıstik fırmasynyń baryp-kelý bıletiniń eń arzan quny 1713 dollardy quraıdy. Biraq oǵan jekpe-jek bıletiniń baǵasy kirmeıdi. Bul jerdegi qarjynyń basym bóligi ushaq bıletine ketedi. Tikeleı reıs bolmaıtyny belgili. Sondyqtan, Frankfýrt nemese San-Fransısko arqyly ǵana qatynaıdy.
Klıentter AQSh-ta 14-19 qyrkúıek kúnderi ǵana bola alady. «Ekonom» paketi – 1713 dollar, onyń ishine ushaq bıleti, arenanyń qasyndaǵy eń arzan otelderdiń biri, vıza jáne saqtandyrý kýáligi kiredi. «Standart» paketi azdap qymbattaý – 1985 dollar. Oǵan New York Hotel & Casino jáne Monte Carlo Resort and Casino sekildi belgili otelder qarastyrylǵan. Ǵımarattar boks keshi ótetin arenadan 600 metr qashyqtyqta ornalasqan.
AQSh-qa jekpe-jek kórý maqsatymen baratyndar ýaqyt joǵaltpaı, qazirden bastap kiriskeni jón. Sebebi, vızaǵa ótinish berý 20 maýsymda aıaqtalady.
Golovkın-Alvares aıqasy 16 qyrkúıek kúni Las-Vegas qalasynyń T-Mobile arenasynda ótedi. Jekpe-jekti HBO telearnasy AQSh-ta aqyly translıasııa júıesi boıynsha kórsetedi. Bul kezdesýge GGG óziniń WBC, WBA (Super), IBF jáne IBO belbeýlerin qoısa, meksıkalyq boksshy The Ring jýrnalynyń beldigin sarapqa salmaq. Hoylosangeles.com málimeti boıynsha arenanyń ishindegi bılettiń eń arzan quny 100-200 dollardy qurasa, eń qymbaty – 1500 dollar.
Aıta keteıik, Gennadıı Golovkınniń amerıkalyq Denıel Djeıkobspen ótkizgen sońǵy aıqasyn qazaqstandyq jankúıerler Madison Square Garden arenasynan kórý úshin 1380 AQSh dollaryn jumsaǵan. Oǵan ushaq bıleti, vıza, jekpe-jek bıleti jáne saqtandyrý kýáligi kirgen bolatyn.
Daıyndaǵan: Aıan ÁBDÝÁLI, "Egemen Qazaqstan"
