Fılmge «Ardı» ońaltý ortalyǵynyń tárbıelenýshisi Dınara Sháripovanyń ómiri arqaý bolǵan. Basty róldi de Dınaranyń ózi oınaıdy. Aıryqsha kınojobada basty rólderden basqa keıipkerlerdi de «ARDI» ońaltý ortalyǵynyń oqýshylary beıneleıdi. Sol sııaqty «О́lsem be, álde qalsam ba?!» dılogııasynyń alǵashqy bólimindegi basty róldegi Tahır Omarovqa da basty róldiń biri buıyryp tur. Sondaı-aq, fılmge Emır Baıǵazınniń «Tórt oqıǵa» fılminde basty róldi somdaǵan Qanaǵat Tasqaraev ta túsedi.
Atalmysh kartınanyń daıyndyq jumystary sáýir aıynyń bel ortasynan bastalǵan bolatyn. Osy aralyqta ssenarıı jazylyp, foto jáne beıne baıqaýlar jasalyp, túsirilim lokasııalary anyqtalypty. Daıyndyq kezeńinde rejısser kıno álemine joldama alǵan akterlardyń dıksııasyn durys qoıý úshin, logopedter jumys istegenin aıtady.
– «Qyz ben teńiz» fılmi «Sheksiz múmkindikter» dılogııasynyń ekinshi bólimi desek te bolady. «О́lsem be, álde qalsam ba?!» atty birinshi bólim arqyly biz sal aýrýyna ushyraǵan jas jigittiń ómirin kórsetýge tyrystyq. Al osy fılmde Áseldiń taǵdyry arqyly armandar alǵa jeteleıtinin, úmitter úzilmeıtinin baıandamaqpyz. Kartınanyń basty keıipkeri óziniń ómirge degen qushtarlyǵymen, erekshe meıirman minezimen dara. Joǵary bilim alyp, qaladaǵy bankterdiń birinde jumys isteıdi. Shyǵarmashylyqqa da óte jaqyn. Bashpaıymen sýret salyp, deni saý adamdarǵa óz-ózine senýge kómektesedi. Fılmde biz onyń ishki jan dúnıesiniń sheksiz baılyǵyn ashyp kórsetpekpiz, – deıdi fılmniń rejısseri ári prodıýseri Ázızjan Zaırov.
Mádenıet jáne sport mınıstrliginiń tapsyrysy boıynsha qolǵa alynǵan kartına Almatyda eki aı boıy túsiriledi dep josparlanǵan.
Aınash Esalı,
«Egemen Qazaqstan»
Almaty
