Budan basqa Dımash ónerine tánti bolyp júrgen qytaılyq azamattar Aqtóbege kelip, Dımashtyń týǵan topyraǵymen jáne týyp-ósken shańyraǵymen tanysqysy keledi eken. Olardyń mundaı josparlary jóninde Egemen.kz tilshisine Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly aıtyp berdi.
Osyǵan baılanysty qazirgi kúni óńirdegi týrıstik kompanııalar arnaıy týrıstik marshrýttar uıymdastyrý qamynda júr. Sondaı-aq sala basshysynyń aıtýynsha búginde Dımashtyń kindik kesken jerine kelgisi keletin sheteldikter qatary kóbeıgen. Olardyń bári Qytaı eliniń azamattary kórinedi. Konsertke deıin jáne konsertten keıin Dımash týyp-ósken ólkege 2000-nan astam qytaılyq azamattar keledi dep kútilýde. Olarǵa aglomerasııalyq aımaqtyń kıeli de kórikti jerlerin kórsetý úshin qosymsha avtokólik baǵyttary belgilengen.
Temir Qusaıyn,
"Egemen Qazaqstan"
Aqtóbe
