– Búgin Batys Qazaqstan oblysynyń ortalyǵynan Eýropadaǵy Frankfýrt qalasyna tike jol tústi. Qazaqstan – álemniń damyǵan elderimen tyǵyz qarym-qatynas ornatqan el. EKSPO-2017 kórmesine Germanııa ókilderi de qatysyp, jańa tehnologııalaryn nazarǵa usynýda. Elbasynyń «Nurly jol» baǵdarlamasy aýqymynda halyqaralyq dálizdi damytý jónindegi tapsyrmasy oryndalýda. Batys Qazaqstan oblysy ákimdigi «QPO b.v.» jáne «Eır Astana» kompanııalarymen kelissóz júrgizip, jańa reıstiń ashylýyna qol jetkizdi. О́tkende «Oral-Máskeý» baǵytynda da reıs ashqan edik. Búginde Oral áýejaıynyń termınalyn halyqaralyq deńgeıge sáıkes jóndeý úshin jobalyq-smetalyq qujattama jasalyp jatyr. Jańa halyqaralyq reıs óńir úshin ınvestor tartýǵa, bıznes salasyndaǵy seriktestikti damytýǵa oń jaǵdaı týǵyzady, – deıdi Batys Qazaqstan oblysy ákiminiń orynbasary Igor Steksov.
Frankfýrt – Germanııada ornalasqan iri áýejaı. Ol Eýropa boıynsha jolaýshylar sany jóninen London qalasyndaǵy Hıtroý, Parıjdegi Sharl-de-Goll jáne Stambuldaǵy Atatúrik áýejaılarynan keıingi 4-orynda tur. Frankfýrt áýejaıynan álemniń túkpir-túkipirine 293 baǵytta jolaýshylar reısi bar eken. Endi, mine, oǵan Qazaqstannyń batys qaqpasy – Oral qosyldy.
- «EKSPO-2017 kórmesi kezinde Germanııaǵa qatynaıtyn jańa reıstiń ashylýy asa mańyzdy ról atqarady. Endi Oralǵa burynǵydan 4,2 saǵatqa erte jete alamyz. «Qarashyǵanaq Petrolıým Opereıtıng b.v.» kompanııasynda 40-tan astam sheteldik memleketten kelgen maman jumys isteıdi. Olar úshin de eline ońaı baryp kelýge jaǵdaı jasaldy», – deıdi «QPO b.v.» kompanııasynyń jobalaryn basqarýshy Trevor Mandeı.
Jolǵa shyqqan Airbus A320 c ushaǵynda ekonom klasty – 132, bıznes-klasty – 16 oryn bar. Eń tómengi bılet baǵasy – 154 935 teńgege eseptelgen.
Qazbek Quttymuratuly,
"Egemen Qazaqstan"
ORAL
