Jyl sońyna deıin oblysymyzdaǵy barlyq densaýlyq saqtaý uıymdarynda medısınalyq aqparattandyrý júıesi 100 paıyz ornatylatyn bolady. Atalǵan júıe densaýlyq saqtaý uıymdarynyń jumystaryn avtomattandyrýdy, qajetti emhanalyq jáne ákimshilik aqparat qurýdy jáne qaǵazsyz tehnologııalarǵa kezeń-kezeńmen kóshýdi qamtamasyz etedi. Búgin bul týraly Shymkent qalalyq №6 emhana jumysymen tanysqan Ońtústik Qazaqstan oblysynyń ákimi Janseıit Túımebaev málim etti.
Aıta keteıik, keshendi medısınalyq aqparattyq júıesi oblysymyzda 2017 jyldyń 1 aqpanynan bastap jumys istep keledi. Qazirgi tańda atalǵan jańa júıe oblystyń ambýlatorlyq-emhanalyq jáne 38 medısınalyq uıymdary men bólimshelerinde ornatylǵan. Atalǵan pılottyq júıege stasıonarlyq qyzmet kórsetetin uıymdar da qosylyp, júıeni tırajdaý máselesin jyl sońyna deıin aıaqtaý josparlanyp otyr.
«Oblysymyzdyń densaýlyq saqtaý salasy kúnnen-kúnge erekshe qarqynmen damyp keledi. Qazirgi tańda medısınalyq kómekti jaqsartý maqsatynda oblysmyzdaǵy barlyq densaýlyq saqtaý uıymdaryna medısınalyq aqparattandyrý júıesin ornatý ústindemiz. Sonymen qatar, osy baǵytta medısınalyq uıymdardy 2017 jyly tolyq kompıýtermen jabdyqtaý josparlanyp otyr. Bul júıeniń tıimdiligi mol. Sondyqtan jańashyldyqqa umtylýdan qoryqpaı, halyqtyń densaýlyǵyn jaqsartýda árqaısymyz aıanbaı eńbek etýimiz kerek», - dedi Janseıit Qanseıituly.
«Damý» aqparattyq tehnologııalyq ortalyǵy ázirlegen joba – «DamuMed» keshendi medısınalyq aqparattyq júıesi dep atalady. Atalǵan óńirlik júıe medısınalyq uıymdarda ishki prosessti avtomattandyryp qana qoımaı, medısınalyq kómek kórsetý deńgeıleriniń bir-birimen ıntegrasııasyn, onkologııa, týberkýlez, kardıologııalyq arnaıy qyzmetterdiń shuǵyl sabaqtastyǵyn qamtamasyz ete alady.
