Beısenbi kúni Astana ekonomıkalyq forýmynda ótken baspasóz máslıhatynda EQDB Qazaqstan boıynsha dırektory Agrıs Preımanıs: «Bizdiń sońǵy boljamǵa sáıkes Qazaqstan ekonomıkasy 2017 jyly 2,4%, al 2018 jyly 3,5% ósedi. Alaıda osy ósim boljamnan da joǵary bolyp iske asýy úshin reformalardy jalǵastyrý óte mańyzdy», – dedi.
Sonymen qatar Banktiń aımaqtyq basshysy syrtqy ekonomıkalyq ortanyń jaqsarǵan jaǵdaıynda memleketke qurylymdyq reformalar men básekege qabiletti, «jasyl» jáne ınklıýzıvti ekonomıka qurý úshin taǵy bir qadam jasaýy kerek ekendigin atap ótti.
Jáne buǵan qosa EQDB prezıdenti Sýma Chakrabartı 22 maýsymda Astanada bastalatyn Shetel ınvestorlarynyń keńesinde qaıta jańǵyratyn energetıkaǵa ınvestısııa arttyrý men aımaqtardyń damýyna kóńil bólý týraly sóz qoǵaıdy dep kútilýde. Chakrabartı myrza Shetel ınvestorlarynyń keńesiniń otyrysynda Qazaqstan Respýblıkasynyń Prezıdenti Nursultan Nazarbaevpen birge tóraǵalyq etedi.
Shetel ınvestorlarynyń keńesiniń operasııalyq komıtetiniń múshesi, EQDB Qazaqstan boıynsha dırektory Agrıs Preımanıs: «EQDB teń tóraǵalyq etetin Shetel ınvestorlarynyń keńesi tartymdy ınvestısııalyq ahýaldy qoldaýda mańyzdy ról atqarady. Men osy keńes Qazaqstan úshin munan bylaı da konstrýktıvti jáne synshy áriptes bolyp qala beredi dep senemin. Eldiń ınnovasııalyq jáne báseke qabiletti bolýǵa baǵyttalǵan kúrdeli qurylymdyq reformalardy júzege asyra bastaǵanyn eskersek, Keńeske múshe elderdiń jáne álemniń basqa da elderiniń tájirıbesi paıdaly bolady», – dedi.
EQDB jáne Qazaqstan Respýblıkasynyń Úkimeti úshin taǵy bir basym baǵyt – el aımaqtaryn damytý. Bank Qazaqstannyń barlyǵyna derlik oblystarynda ártúrli salalarǵa ınvestısııa salyp, jumys istep keledi.
«Qazaqstannyń turaqty túrde damýyna barshamyz da múddelimiz. Jáne EQDB «jasyl» jáne ınklıýzıvti damýǵa zor úles qosqanyna rızamyn. О́tken demalys kúnderi kezekti ınvestısııalyq jobaǵa qol qoıdyq. Ol «Býrnoe» kún elektr stansııasynyń kólemin eki ese úlkeıtedi. Biz bergen 50 mln AQSh dollary kólemindegi nesıe taza energııa shyǵarýǵa jáne Jambyl oblysynda jańa jumys ornyn ashýǵa kómektesedi. Bank jaqynda ǵana kólemi 1 mlrd AQSh dollary bolatyn baǵdarlamany bekitti. Ol energetıka jáne tabıǵı resýrstar sektorynda áıelder men jastardyń múmkindikterin keńeıtýge baǵyttalǵan» dedi EQDB Qazaqstan boıynsha dırektory Agrıs Preımanıs.
EQDB ekonomıka, saıasat jáne basqarý boıynsha basqarýshy dırektory Mattıa Romanı Qazaqstan «Beldeý jáne baǵyt» bastamasy beretin jańa múmkindikterdi paıdalaný kerek dep esepteıdi. Bastama «EKSPO-2017» barysynda ashylatyn Astana halyqaralyq qarjy ortalyǵyna «jasyl» qarjylandyrý júıesin qurýǵa múmkindik beredi.
«Mıllıondaǵan kórermender jaqynda ǵana «Bı-Bı-Sı» arnasynyń Qytaımen shekarada ornalasqan «Horgos» qurǵaq portynyń qurylysy týraly derekti fılmin tamashalady. Mundaı jańa jobalar búkil álemniń nazaryn aýdarady. Biz bul qyzyǵýshylyq jańa múmkindikterdiń ashylýyna ákeledi dep senemiz», – deıdi EQDB Qazaqstan boıynsha dırektory Agrıs Preımanıs.
Aınash Esalı,
«Egemen Qazaqstan».
Almaty
