Qatysýshylardyń basym bóligin jastar quraǵan jıynda EKSPO-2017 mamandandyrylǵan kórmesiniń máni men mańyzy, elimizdiń búgini men keleshegine qatysty atqarar róli jaıly sóz boldy.
Ekologııa úlken problemaǵa aınalyp otyrǵan HHI ǵasyr – energııa kóziniń jańa tehnologııasyn oılap tabýymen tarıhta qalýǵa tıis. Aýany lastaıtyn, tabıǵatty zaqymdaıtyn, adam densaýlyǵyn buzatyn shıkizat kózderin meılinshe az tutyný máselesi kóterilip kele jatqaly da kóp ýaqyt boldy.
Búgingi tańda álem ǵalymdary oılap taýyp jatqan tyń energııa kózderin jappaı qoldanysqa engizetin kún de alys emes. Sol kezde osy taqyrypta kórme ótkizgen elimizdiń úlesi jaıly az aıtylmaıtyn bolady. Bul kórmeni ótkizýdiń bir mańyzy osy. Odan ózge, shartaraptan kelip jatqan sońǵy ǵylymı-tehnıkalyq jańalyqtar el óndirisiniń jandanýyna yqpal etedi. О́zgeden úırenem deýshilerge de múmkindik mol. Bul kórme – bolashaq jańa áriptes-
tikterdiń bastaýy bolýǵa tıis.
Kórmeniń saıası mańyzy jaıly da aıtylmaı qalǵan joq. Forýmnyń ashylýynda sóz sóılegen «Dostyq úıi – qoǵamdyq kelisim ortalyǵynyń» dırektory Táńirbergen Qasymberkebaev:
– TMD elderi aýmaǵynda alǵash ret ótip otyrǵan iri kólemdegi úlken kórmege 115 memleket pen 22 halyqaralyq uıymnyń qatysýy kóp nárseden habar beredi. Álemge degen dostyq pen yntymaqtastyq ustanymymyzdyń kórinisi bul. Mańyzdylyǵy jaǵynan dúnıejúzilik mańyzdy ekonomıkalyq forýmdar men týrızm salasy boıynsha eń úlken sharanyń Qazaqstanda ótýi – elimizdiń halyqaralyq deńgeıdegi yqpalyn asyra túsetini anyq, – dedi.
Bul shara negizinen jastarǵa arnaldy deýge de bolady. Alańǵa jınalǵan jastar fleshmob uıymdastyryp, qosylyp án saldy. «EKSPO kórmesi aldymen mereke bolýǵa tıis», deıdi uıymdastyrýshylar. Sol sebepti, osyndaı kóńildi, erkin pishimdegi forým ótkizýdi maqul kóripti.
Almas NÚSP,
«Egemen Qazaqstan»
Almaty oblysy
