Prezıdent janyndaǵy Adam quqyqtary jónindegi komıssııanyń tóraǵasy Qýanysh Sultanovtyń jetekshiligimen ótken jıynda, taqyryp boıynsha Ádilet mınıstri Marat Beketaev pen Advokattardyń respýblıkalyq alqasynyń tóraǵasy Ánýar Túgel baıandama jasady.
Al komıssııa otyrysynyń jumysyna zań shyǵarýshy, atqarýshy organdar men Qazaqstan Respýblıkasy sot júıesi bıliginiń jaýapty mamandary, halyqaralyq uıymdar men úkimettik emes uıymdardyń, advokattar tobynyń, qaýymdastyqtardyń ókilderi qatysqan edi.
Arnaıy baıandama jasaǵan komıssııa músheleri advokatýra qyzmetiniń elimizdegi mańyzdy quqyqtyq ınstıtýty bola tura negizgi mindeti, ol – mamandanǵan zańdyq kómekti alý boıynsha azamattardyń konstıtýsııalyq quqyqtaryn qamtamasyz etý bolyp tabylatyndyǵyn basa aıtty.
Sonymen qatar, osy maqsatty júzege asyrýda memleketke járdem etý ári azamattardyń jáne basqa da tulǵalardyń quqyǵy men zańdy múddelerin qorǵaý ekendigi aıryqsha atap ótildi.
Al talqylaý barysynda komıssııa músheleri men sarapshylar Qazaqstandaǵy advokatýra ınstıtýtyn damytýdy, sot isin júrgizýde jáne sot sheshimderi sheńberindegi advokattardyń rólin arttyrýdy, qylmystyq prosestiń belsendi qatysýshysy retinde advokattardyń prosessýaldyq quqyqtaryn júzege asyrýdyń tıimdi quqyqtyq mehanızmderin belgileýdi usyndy. Jalpy alǵanda, komıssııanyń otyrysy barysynda ázirlengen usynymdarmen Memleket basshysy, Parlament pen Úkimet tanystyrylady dep josparlanǵan.
Aıta keteıik, búgingi tańda elimizde advokatýra ınstıtýty Advokattardyń respýblıkalyq alqasy men jalpy sany 4 myńnan astam advokatty quraıtyn advokattardyń 16 óńirlik alqasy qalyń buqaraǵa óz qyzmetin kórsetip keledi. Onda bilikti zańgerlerdiń advokat mamandyǵyn alýdy jeńildetý men advokattardyń jaýapkershiligin mindetti saqtandyrý ınstıtýtyn engizý, sondaı-aq halyqqa tegin zańdyq kómek kórsetýdi baqylaý mehanızmin ázirleý syndy jumystar usynylady.
Aleksandr Tasbolatov,
«Egemen Qazaqstan»
