Al qaıtalanbas ǵajaıyp sátti fotoshejiremizge syıǵa tartqan baıyrǵy qyzylordalyq fototilshi Bolat Omarálıev: «1982 jyly Turmaǵanbet aqynnyń 100 jyldyq mereıtoıyna qazaqtyń betke ustar barsha zııalylary jınaldy. Turmaǵanbet Iztileýovtiń ǵasyrlyq toıynda eki kisi eleýsizdeý jerde otyr eken. Bolmystary bólek adamdardy sýretke túsirip aldym. Olardyń otyrysy maǵan bólekshe kórindi. Kimderdiń urpaǵy ekenin 10 jyldan keıin ǵana bildim», deıdi.
«Keıin meniń bilgenim, Álimqul – Jambyldyń ortanshy uly Toqquldyń balasy eken. 1927 jyly Álimquldyń alty aılyǵynda Toqqul qaıtys bolady da, ol ákeden jetim qalǵan. Sodan Jambyldyń inisi Satysh baýyryna salyp ósirgen kórinedi. Jasynan Jambyl atasynyń janynda júrip, tálim-tárbıe alady. Atasynyń talaı jyryn jatqa aıtyp erjetedi», dep fototilshi sýretke ilespe joldar jazypty.
Jyr alyby Jambyldyń nemeresi, Qazaqstannyń halyq aqyny, Qazaqstan Respýblıkasynyń eńbek sińirgen mádenıet qaıratkeri, «Qurmet Belgisi» ordeniniń ıegeri, Almaty oblysynyń jáne Jambyl aýdanynyń Qurmetti azamaty Álimqul Jambylov 2015 jyldyń 14 qarashasynda 88 jasynda dúnıeden ozǵany barshamyzǵa aıan.
Jambyldyń jalǵasyndaı bolǵan Álimqul atamyz qazaqtyń aqpa-tókpe aqyndyq dástúrin qaımaǵyn buzbaı jalǵastyrýshylardyń biri bolǵanyna tiri kúninde kýá boldyq.
Al Ahat Shákárimuly 1900 jyly dúnıege kelip, 84 jasynda qaıtys boldy. Bul sýretke túskende Ahat aqsaqal 82 jasta eken. Zamanynda Shákárimniń barlyq balalary, nemereleri qamaýǵa alynyp, jazyqsyz japa shegedi. Túrmedegi aýyr azap, qorlyqqa shydamaǵan Gafýr, Baıazıt ózine ózi qol jumsap qaıtys bolady. Qabysh taıaq pen ashtyqtyń azabynan Shyńǵystaý men eki ortada jolda óledi. Zııat Qytaıǵa ótip ketkenmen quryǵy uzyn qııanatshyldardan qutyla almaı, qaıǵyly qazaǵa ushyraıdy. Túrmede jatqan Ahat ákesiniń qaza bolǵanyn estip, bir ýys topyraq sala almaı qaıǵynyń ýyn ishedi.
Asyldyń tuıaǵy 1958 jyly 29 qazanda Shákárim aqyn aqtalǵanda 30 jyl qudyqta jatyp qalǵan ákesiniń súıegin qazyp, túgendep jınap,qaıta arýlap uly ustazy Abaıdyń zıratynyń janyna jerleıdi.
Oraıy kelip turǵanda Shákárimniń ánshilik murasynyń jınalyp, zerttelýine kóp eńbek sińirgen óz balasy Ahat Qudaıberdıev bolǵanyn aıtý paryz. Eren jumystyń arqasynda Shákárimniń ánderi 1989 jyly «Amanat» atty mýzykalyq-etnografııalyq jınaq bolyp jaryqqa shyqty. Bul basylym Shákárim ánderiniń ǵylymı-zerttelýine jol ashty.
Mine, bir sýrette eki alyp tulǵanyń tuıaǵynyń izi osyndaı.
Aınash ESALI,
«Egemen Qazaqstan»
ALMATY
Sýretti túsirgen
Bolat OMARÁLIEV
