Osy nysandy turǵyzý úshin bıýdjeten 214,3 mıllıon tenge bólingen eken. Áıtse de bıýdjet qarajatyn tıimsiz paıdalaný saldarynan ınvestısııalyq jobanyń joly kesilgen. Árıne bul arada «Aqtóbe áleýmettik-kásipkerlik korporasııasynyń» basy-qasynda júrgender barlyq is-qımyldy birinshi kezekte zaýyt qurylysyn júrgizýge jumyldyrýy kerek edi. Alaıda olar ózderiniń tikeleı atqarýǵa tıisti mindetterine jaýapsyz, saldyr-salaq qaraǵan. Sóıtip nysannyń irgetasyn kóterýdiń ornyna 143,9 mıllıon tengege ábden eskerip, qaraýsyz qalǵan ǵımaratty satyp alypty.
Sonyń saldarynan zaýyt qurylysy toqtap qaldy. Memleket aktıvteri tıimdi túrde paıdalanylmaýynyń kesirinen áınek shyǵarý men energııa saqtaǵysh paketterdi óndiriske qoıý isi qurdymǵa ketip tyndy. Aıtyp aıtpaı ne kerek, áıteýir korporasııa jetekshileri 73 mıllıon tengeni jarǵylyq kapıtaldaǵy úleske salýmen ǵana shektelgen. Buǵan da táýbe dersiz. Tutastaı alǵanda «Aqtóbe áleýmettik-kásipkerlik korporasııasyna» qarasty «Azııa Agro Holdıngi», «Bazarlardy basqarý», «Batys Agro 2008», «Tabys qala» enshiles kásiporyndaryna ústeme aýdıttik baqylaýlar júrgizý nátıjesinde 648,8 mıllıon tengeniń aktıvteri men bıýdjet qarajattary tıimsiz paıdalanylǵany belgili boldy. Bul kórinistiń ózi óńirdegi ınvestısııalyq jobalardy iske asyrýǵa ájeptáýir nuqsan keltirdi.
- Sóıtip aımaqtaǵy áleýmettik-ekonomıkalyq mańyzy óte joǵary nysandardyń biri belgilengen ýaqytta paıdalanýǵa berilmeı qaldy. Munyń ózi óńirdegi áınek óndirisi naryǵyn jolǵa qoıý jáne qosymsha jumys oryndaryn qurý jónindegi is-qımyl baǵdarlamasynyń oıdaǵydaı oryndalýyna keri áserin tıgizdi, - dedi «Egemen.kz» tilshisine Aqtóbe oblysy oıynsha tekserý komıssııasynyń tóraǵasy Saǵat Eńsegenuly.
Temir Qusaıyn
