Qazaqstan Parlamenti Senaty Tóraǵasynyń orynbasary Sergeı Gromov «EKSPO-2017» halyqaralyq kórmesine belsendi qatysqany úshin Polshaǵa alǵys aıtty. Qazirgi kezde kórmede balama energetıka men «jasyl» ekonomıka salasyndaǵy álemdik tehnologııanyń úzdik úlgileri kórinis tapty.
S. Gromov Varshava bizdiń elimizdiń Eýropa Odaǵyndaǵy jáne Ortalyq Eýropadaǵy mańyzdy áriptesi ekenin atap ótti. Onyń pikirinshe, Polsha Prezıdenti Andjeı Dýdanyń bıylǵy qyrkúıektegi Astanaǵa sapary yntymaqtastyqtyń keleshegi zor baǵyttaryn ilgeriletýge yqpal etetin bolady.
Qazaqstan Senaty Tóraǵasynyń orynbasary bizdiń elimiz Parlamenti joǵarǵy Palatasynyń konstıtýsııalyq ókilettikterimen jáne elimizdegi saıası jáne áleýmettik-ekonomıkalyq reformalardyń negizgi baǵyttarymen meımandardy tanystyrdy.
Áńgime barysynda ekonomıkalyq jáne gýmanıtarlyq salalardaǵy ekijaqty baılanystardyń keleshegi talqylandy. Kezdesýge qatysýshylar parlamentaralyq baılanystardy damytýǵa erekshe nazar aýdardy.
Marııa Kos bizdiń elderimiz arasynda qol jetken ózara túsinistik deńgeıin joǵary baǵalady jáne Qazaqstan men Polsha arasyndaǵy parlamentaralyq dıalogty jalǵastyrý qajettigi týraly aıtty.
