Astanadaǵy WSEC EKSPO-2017 mamandandyrylǵan halyqaralyq kórmesiniń iskerlik baǵdarlamasy aıasynda ótýde.
- Búginde búkil álem ortaq mańyzdy máselege alańdaýly: álemdik energetıka qalaı damıdy, qandaı tetikterdiń bolashaǵy zor? EKSPO-2017 alańy, onyń ishindegi bizdiń kongress ǵalamdyq máseleni talqylaýǵa zor múmkindik beredi dep oılaımyn. Ásirese, bul taqyryp dástúrli shıkizat ekonomıkasyna yqpaldy elder úshin asa mańyzdy: olardyń árqaısysy energetıkalyq salanyń baǵyt-baǵdaryn ózgertip jatyr, onyń ishinde Qazaqstanda da bar, - dedi Qazaqstan Respýblıkasynyń bilim jáne ǵylym vıse-mınıstri Aslanbek Amrın.
Dúnıejúzilik kongrestiń negizgi maqsaty – jahandyq energetıka máseleleriniń jańa sheshimderin izdeý, kadr daıyndaý, tehnologııa, qurastyrý jáne ınnovasııa tetikteri. Forýmǵa 1000-nan astam ǵalymdar men ınjenerler, bilim berý, bıznes salalarynyń ókilderi jáne álemniń 51 elinen kelgen memelekettik organdar men halyqaralyq uıymdardyń beldi tulǵalary qatysýda.
– Bizdi 20-dan astam bedeldi halyqaralyq energetıkalyq uıymdar qoldady. Demek, kongrestiń taqyryby Qazaqstan úshin ǵana emes, dúnıejúzi elderi úshin de ózekti. HHI ǵasyrdyń ǵalamdyq máselesi: tabıǵı resýrstardyń taýsylýy, jahandyq energetıkalyq qaýipsizdik, úshinshi ındýstrıaldyq revolıýsııa. Jańa kezeń keledi, baǵyt-baǵdarlar ózgeredi, ǵylymı jetistikterge, ınnovasııa jáne ınjenerlik isterge suranys artady. Al bizdiń maqsat atalǵan mańyzdy tapsyrmalardy oryndaý jáne tyǵyryqtan shyǵýdyń jolyn izdeý, - dedi WSEC halyqaralyq baǵdarlamalyq komıtettiń qosarlas tóraǵasy, QR ulttyq ınjenerlik akademııasynyń prezıdenti Baqytjan Jumaǵulov.
Eki kún ishinde Kongress-ortalyqtyń alańynda 300 baıandama jasalyp, 80 ǵylymı tanystyrylym ótedi. Uıymdastyrýshylardyń aıtýynsha, forýmǵa energetıka máselelerin tereńnen zerttep júrgen 100-ge jýyq jas ǵalymdar da qatysady.
– 2015 jyldan beri ındýstrıaldy-ınnovasııalyq damý memlekettik baǵdarlamasynyń aıasynda 11 qazaqstandyq ınstıtýt ınnovasııalyq baǵdarlamar ázirledi. Jalpy Qazaqstannyń joǵary mektepteriniń aldynda jańa mindetter qoıyldy. Bizdiń eldi bilim men ınnovasııanyń ortalyǵyna aınaldyrý, halyqaralyq deńgeıde qajetti ınjenerlik kadr mamandaryn daıyndaý syndy naqty tapsyrmalar bar. Ol úshin bilim berý mazmunyna jańasha kózqaras qajet, zamanaýı tehnologııalar men olardy damytý qarqyny joǵary bolýy tıis. Injenerler energetıkalyq salanyń jańa syn-tegeýrinderine, qaýipsizdik, ekologııalyq baǵdarlaryna daıyn bolýy qajet, - dedi Qazaqstan Respýblıkasynyń bilim jáne ǵylym vıse-mınıstri Aslanbek Amrın.
Kongresti syrtqy ister mınıstrligi, energetıka, bilim jáne ǵylym mınıstrlikteri, sondaı-aq, Astana qalasynyń ákimdigi men EKSPO-2017 qoldaýymen QR ulttyq ınjenerlik akademııasy jáne Qazaqstan ulttyq jaratylystaný ǵylymdary akademııasy uıymdastyrdy. Injenerler men ǵalymdardyń dúnıejúzilik kongresi Elordada eki kúnge jalǵasady: 19-20 maýsym. 21 maýsymda kongrestiń qatysýshylary men qonaqtary úshin EKSPO-2017 kórmesine ekskýrsııa uıymdastyrylady.
