Dóńgelek ústel jumysyna Joǵarǵy jáne jergilikti sottardyń sýdıalary, Bas prokýratýranyń, Ádilet mınıstrliginiń, Ulttyq Bank pen ekinshi deńgeıli bankterdiń, «Atameken» UKP men Qazaqstannyń qarjygerler qaýymdastyǵynyń ókilderi qatysty.
Is-sharany asha kele, Joǵarǵy Sottyń azamattyq ister jónindegi sot alqasynyń tóraǵasy E.Ábdiqadyrov Prezıdenttiń Qazaqstan halqyna Joldaýyndaǵy negizgi mindet retinde zańnamany jańa jaǵdaıatqa saı beıimdeýdiń basym mindetteriniń biri retinde aıqyndalǵanyn atap ótti.
Prezıdent problemalyq ıpotekalyq qaryzdardy qaıta qarjylandyrý baǵdarlamasyna erekshe nazar aýdarýdy tapsyrdy. Osy oraıda bıylǵy jyly «Bankter jáne bank qyzmeti týraly» Zańǵa, Qazaqstan Respýblıkasynyń Azamattyq kodeksine ózgerister men tolyqtyrýlar engizildi. Sondaı-aq, kollektorlyq agenttikterdiń qyzmetin retteıtin «Kollektorlyq qyzmet týraly» Zań qabyldandy.
Joǵaryda atalǵan normatıvtik aktilerdiń normalaryna sáıkes, Joǵarǵy Sottyń bastamasymen bankterdiń qaryz alýshylarǵa talap qoıý merzimi bes jyl dep belgilengen.
Dóńgelek ústel barysynda Ádilet mınıstrliginiń Zańnama departamenti dırektorynyń orynbasary N.Jamaladın, Bas prokýratýranyń 4-departamentiniń Joǵarǵy Sotta qatysýyn qamtamasyz etý bóliminiń bastyǵy A.Ibraeva, Ulttyq Banktiń qarjylyq qyzmetterdi tutynýshylardyń quqyqtaryn qorǵaý jáne syrtqy kommýnıkasııalar basqarmasynyń orynbasary I.Ál-Keısı, Astana qalasy sotynyń sýdıasy Sh.Núsipova, Almaty qalalyq sotynyń sýdıasy R.Baıshev baıandama jasady.
Dóńgelek ústelge qatysýshylar Joǵarǵy Sottyń quqyq qoldaný máselelerin sheshýdegi mańyzdy rólin atap ótip, banktik zańnamanyń oń ózgeristeri jáne quqyq qoldaný máselelerin talqylaý men olardy sheshý joldaryn tabýǵa múmkindik beretin osyndaı úlgidegi is-sharalardy ótkizý qajettigi ataldy.
Dóńgelek ústel jumysynyń sońynda zańnamany jetildirý boıynsha tıisti usynymdar ázirlendi.
Joldybaı BAZAR,
«Egemen Qazaqstan»
