Qoǵam ómirine belsendi aralasyp júrgen Qurmanǵazy aýdany ákimi janyndaǵy analar keńesiniń tóraıymy Balǵanym Hasenova «Azamattyq asqaqtyq» atalymyna laıyq dep tanyldy. Al ustazdar dınastııasyn jalǵastyrýshy Maǵısa Ibrasheva «Eren eńbek joly» nomınasııasynda úzdik atandy. Ol basqaratyn Inder aýdanyndaǵy Q.Abahanov atyndaǵy orta mektep birneshe jyl qatarynan «Úlgili bilim mekemesi», «Jyl mektebi» bolyp júr. «Memlekettik qyzmet sapynda» nomınasııasy boıynsha Maqat aýdandyq jumyspen qamtý jáne áleýmettik baǵdarlamalar bóliminiń meńgerýshisi Gúljanar О́teshovanyń esimi ataldy.
Nurlan Esmuhanov – «Tabıǵat janashyry», Abylaı Qurmetuly «Jastyq jiger», Murat Bektenov «Urpaqqa ulaǵat» atalymdarynda arnaıy marapat ıelendi. Patrıottar forýmynyń eń jas qatysýshysy – qurmanǵazylyq Ermahan Nasıhan. Eńbekshi orta mektebinde oqıtyn 13 jastaǵy Ermahan dosy Beıbarys Qaırollauly ekeýi Surhan ózeninde sýǵa batyp bara jatqan áıeldi qutqaryp qalǵan edi. Ishki ister mınıstrliginiń «Tótenshe jaǵdaıdaǵy erligi úshin» tósbelgisimen, Bilim jáne ǵylym mınıstrliginiń «Eljandy patrıot» tósbelgisimen marapattalǵan E.Nasıhannyń esimi taǵy da úzdikter qatarynda ataldy.
Oblystyq ishki saıasat basqarmasy basshysynyń mindetin atqarýshy Zlıha Talasbekovanyń aıtýynsha, mundaı sharalardyń maqsaty – azamattardyń qoǵam ómirine belsendi qatysýyn yntalandyryp, jaqsy qasıetteri men izgilikti isterin elge úlgi etý.
Baqytgúl BABASh,
«Egemen Qazaqstan»
ATYRAÝ
