Astana ekonomıkalyq forýmy aıasynda О́ńirlik hab pen Brazılııa Syrtqy ister mınıstrliginiń dıplomatııa ınstıtýty, Bangladesh premer-mınıstri keńsesi, Estonııa elektrondy basqarý akademııasy, Islam Yntymaqtastyǵy Uıymynyń Zertteýler men oqytý ortalyǵy (SESRIC), Qazaqstannyń «Azamattarǵa arnalǵan Úkimet» memlekettik korporasııasy arasynda yntymaqtastyq memorandýmdary men kelisimderge qol qoıyldy.
– Jahandaný men aqparattyq tehnologııalar basqarý salasynda jańa synaqtar ári múmkindikter týǵyzýda: azamattar óz kompanııasyndaǵy, memlekettik organdardaǵy jaǵdaıdy, jetekshiler qabyldaıtyn sheshimderdi álemniń basqa elderindegi jaǵdaımen salystyra alady, ıaǵnı olardyń basshylyqqa qoıar talaby da kúsheıýde, – dedi Astanadaǵy О́ńirlik habtyń basqarýshy komıtet tóraǵasy Álıhan Baımenov.
Memorandýmdarǵa qol qoıý rásimine qatysýshylar memlekettik qyzmet salasyn jetildirýde yntymaqtastyq pen halyqaralyq áriptestiktiń mańyzyn atap ótti. Memlekettik basqarýdaǵy ortaq maqsat ári qajettilik – laıyqty ári qolaıly ortany qalyptastyrý. Jáne bul talap qundylyqtarǵa, onyń ishinde, eń aldymen, syılastyq pen túsinistikke negizdelýi tıis. «Eger árbir basshy halyqtyń, óz qaramaǵyndaǵy qyzmetkerlerdiń múddesin, abyroıyn, eńbegin qurmettep, túsinse, onyń baǵa jetpes qundylyǵy – ýaqytyn syılasa, basqarýdyń tıimdiligi artady», – dep sanaıdy Álıhan Baımenov.
«Astana óńirlik haby aıasynda basqa eldermen tájirıbe almasamyz. Onyń ishinde, Qazaqstannyń da memlekettik qyzmet salasyndaǵy tájirıbesimen tanysqymyz keledi. Sondyqtan, bul yntymaqtastyq biz úshin óte mańyzdy ári eki memleketke de paıdasyn tıgizedi dep oılaımyn», – dedi Bangladesh premer-mınıstri keńsesiniń Access to Information baǵdarlamasy saıasaty boıynsha keńesshisi Anır Choýdhýrı. Al Brazılııa SIM «Rıo Branko» dıplomatııa ınstıtýtynyń bas dırektory Joze Estanıslaý do Amaral Soýza Neto Astanaǵa alǵashqy saparynyń sátti bastalǵanyn jáne memorandýmǵa qol qoıý eki el arasyndaǵy yntymaqtastyqqa da oń yqpalyn tıgizetinin jetkizdi.
Qonaqtar Habtyń aımaq elderi memlekettik qyzmetin damytýǵa qosqan eleýli úlesi men aýqymdy saraptamalyq qoryn atap ótti. Uıymnyń sarapshylar reestri 25 eldiń 90-nan astam jetekshi mamandaryn biriktiredi, memlekettik basqarý salasyndaǵy 30-dan astam bedeldi halyqaralyq uıymmen turaqty áriptestik ornatqan.
Sondaı-aq, Astana ekonomıkalyq forýmy aıasynda Álıhan Baımenov EYDU memlekettik basqarý boıynsha dırektory Rolf Altermen, AQSh Federaldy ınstıtýty kóshbasshylyqty halyqaralyq damytý dırektory Fletcher Hanımýndpen, Reseı prezıdenti janyndaǵy Halyq sharýashylyǵy men memqyzmet akademııasy rektory Vladımır Maýmen, О́zbekstan prezıdenti jaǵyndaǵy Memlekettik basqarý akademııasy prorektory Bahodır Ǵoııbnazarovpen kezdesip, ózara yntymaqtastyqty damytý máselelerin talqylady. Al memlekettik basqarý salasyndaǵy belgili sarapshylar – Sıngapýr ulttyq ýnıversıteti Shyǵys-azııalyq ınstıtýty professory Gor Lans Lıanpıng jáne Japonııa joba menedjmenti qaýymdastyǵynyń negizin qalaýshy, professor Hıroshı Tanakamen ǵylymı baǵytta ózara qarym-qatynasty nyǵaıtý týraly pikir almasty.
Amerıka, Eýroodaq, TMD, Kavkaz jáne ASEAN elderin qamtıtyn Hab aýqymyndaǵy áriptestik memlekettik qyzmet salasyndaǵy ozyq úlgilermen tanysýdy, bilim jáne tájirıbe almasý boıynsha halyqaralyq bastamalar men sharalarǵa qatysýdy, sarapshylar jelisin damytýǵa at salysýdy bildiredi.
Memorandýmdardy júzege asyrý barysynda qatysýshy-memleket ókilderi saraptamalyq materıaldar men zertteýler nátıjelerimen almasyp, birlesken ǵylymı-oqytý jobalaryna aralasa alady. Olardyń memlekettik basqarýdyń ózekti máseleleri boıynsha ortaq oqytý baǵdarlamalaryna, onyń ishinde dárister, semınarlar, trenıngter, konferensııalar men forýmdarǵa qatysyp, oı bólise alý múmkindigi bolady.
Qalmahanbet MUQAMETQALI,
«Egemen Qazaqstan»
