Júrgizilip jatqan jumystar jalǵasady

Satyp alýlar salasy jetildiriledi

Memlekettik satyp alýlar júıesin jetildirý sharalary týraly Qarjy mınıstri Baqyt Sultanov baıandady. Mınıstr bir jarym jyl buryn iske qosylǵan memlekettik satyp alýlar veb-portalynyń platformasy satyp alýlar júıesin tolyǵymen avtomattandyryp, qatysýshylardy veb-portal arqyly onlaın rejimde elektrondy kameralyq baqylaýǵa múmkindik bergenin aıtyp ótti. Jalpy, qabyldanǵan sharalar bir konkýrstaǵy qatysýshylardyń ortasha sanyn 4 esege, al únemdeýdi 3 esege ulǵaıtýǵa múmkindik bergen.
Qarjy mınıstrligi Inves­tı­sııalar jáne damý mınıstrligimen jáne «Atameken» UKP-men bir­lesip, otandyq óndirýshilerge qol­daý kórsetý sharalaryn ázirlegen, solardyń ishinde Biryńǵaı uıym­dastyrýshy arqyly satyp alynatyn taýarlardyń, jumystardyń, qyzm­etterdiń tizimdemesi ulǵaı­tylǵan. Sonymen qatar, usaq satyp alýlardy bir úlken lotqa biriktirý josparlanǵan.
B.Sultanovtyń aıtýynsha, kvazı­memlekettik sektordyń sa­typ alý­laryn zańnamalyq retteýdi qaras­tyratyn zań jobasy ázirlenip jatyr. Mınıstrlikte kvazımem­lekettik sektordyń barlyq sýbek­tilerine biryńǵaı satyp alýlar erejesin bekitý boıynsha ýákiletti organdardy anyqtaý josparlanǵan, solardyń ishinde «Samuryq-Qazyna», «Báıterek», «QazAgro» ulttyq holdıngteri bar. Ulttyq kompanııalardyń satyp alýlary úshin jeke erejeler ázirlenbek, olar memlekettik satyp alýlarǵa qaraǵanda barynsha ıkemdi bolady.
Máseleni talqylaý qory­tyn­­dysynda Úkimet basshysy B.Saǵyn­taev memlekettik satyp alýlar jáne kvazımemlekettik sektordyń satyp alýlary salasyn jetildirý boıynsha zań jobasyna qatysty jumysty ýaqytynda aıaqtaýdy tapsyrdy. 
«Jalpy, osy jerde aıtyl­ǵan barlyq usynystardy qol­daımyz. Talqylap, Prezıdent Ákim­shiligimen kelisý úshin bir apta ýaqytymyz bar. Kelesi joly daýys beretin bolamyz jáne maýsym aıynyń sońyna deıin­gi belgilengen merzimde zań jo­basyn Májiliske engizýge tıispiz. Júr­gizilip jatqan jumystar­dy jalǵastyramyz», dedi B.Sa­ǵyn­taev. 

Densaýlyq saqtaýdyń ınfraqurylymy damıdy

Úkimet otyrysynda qaralǵan kelesi másele – densaýlyq saqtaý júıesiniń ınfraqurylymyn damytý jaıy. 
Densaýlyq saqtaý mınıstri Eljan Birtanovtyń málimeti boıynsha, 2016-2019 jyldarǵa ar­­nalǵan «Densaýlyq» mem­le­ket­tik baǵdarlamasy aıasyn­da Den­saýlyq saqtaý mınıstrligi «Den­saýlyq saqtaý ınfraqurylymyn damytýdyń biryńǵaı perspek­tıvalyq josparyn» ázirlep jatyr.
Medısınalyq uıymdardyń je­lisi «Densaýlyq saqtaý ınfra­qurylymyn damytýdyń biryń­ǵaı perspektıvalyq jospary» negizinde júıelenedi. Onda alǵashqy medısınalyq kómek­tiń qoljetimdiligin arttyrý, ınfra­qurylymdy jańǵyrtý, medısınalyq uıymdardyń menedjmentin jaq­sartý, ınvestısııalar tartý jáne jeke sektordyń úlesin ulǵaıtý, densaýlyq saqtaý júıesiniń sapasy men ekonomıkalyq tıimdiligin arttyrý kózdelgen.
E.Birtanovtyń aıtýynsha, elimizde bir jerde aýrýxa­nada naýqastarǵa oryn jetpeı jatsa, kelesi mekenjaıda, keri­sinshe, emxanadaǵy bos oryndar tym kóp bolyp ketken. Bul densaýlyq saqtaý salasy­nyń ınfraqurylymyn durys jos­par­lamaýdyń kórinisi, deıdi mınıstr. Búgingi tańda den­saýlyq saqtaý salasynyń ınfra­qu­rylymyn damytýdyń biryńǵaı jospary daıyndalyp jatyr. 
«Qazaqstanda 7914 densaýlyq saqtaý mekemesi bar. Sonyń ishin­de 85,5 paıyzy  memlekettik emxa­nalar bolsa, 14,5 paıyzy jeke men­shikke tıesili. Medısınalyq uıymdardyń teń jartysy 30 jyl buryn salynǵan. О́tken jyly 11 myńǵa jýyq adam aýrýxanaǵa jat­qyzýdy 90 kúnnen astam ýaqyt kútken. Alaıda, respýblıka bo­ıyn­sha 4,2 myń jatyn oryn bos turdy. Osynyń ózi durys jospar qur­maýdyń dáleli», dedi E. Birtanov. 
Mınıstrdiń málimdeýinshe, qazirgi kezde jergilikti atqarýshy organdar medısına salasyn damytýǵa 1 trln teńge surap otyr. Degenmen, qurylys nysandaryn josparlaý kezinde olardyń bıýdjet aqshasyn kóptep alýǵa da talpynatyndary joq emes. Máselen, Astanada balalarǵa arnalǵan ınfeksııalyq emxanada bir jatyn orynǵa 240 sharshy metr qarastyrylǵan. Ondaı kórsetkish xalyqaralyq talaptardan eki ese artyq, al respýblıka boıynsha salynatyn nysandardyń kórsetkishinen alty ese joǵary bolyp tur. Osylaısha, bir jatyn orynǵa bıýdjettiń biraz aqshasy ketip jatady. 
«Ambýlatorlyq mekemeni salý kezinde naqty qajettilik, ıaǵnı jergilikti xalyqtyń sany eskeril­meıdi. Osynyń saldarynan jatyn oryndar bos turady. Jergilik­ti atqarýshy organdar bıýdjet qara­jatyn tıimdi jumsaýǵa jaýapsyz qaraıdy. Sondyqtan bizge densaýlyq saqtaýdyń ınfraqurylymyn da­mytýdyń biryńǵaı jospary asa qajet», dedi mınıstr.
Otyrysta, sondaı-aq, Dú­nıe­júzilik banktiń Qazaqstandaǵy turaqty ókili A.Braýn, Azııa damý bankiniń Qazaqstandaǵy ókil­diginiń dırektory Dj. Kapannellı, sondaı-aq Almaty obly­synyń ákimi A.Batalov atalǵan baǵyt boıynsha atqarylyp jat­qan jumystar týraly baıandady.
Premer-Mınıstr B.Sa­ǵyn­taev Densaýlyq saqtaý mınıstr­li­gine oblystardyń, Asta­na men Almaty qalalarynyń ákim­deri­men densaýlyq saqtaý nysan­darynyń jelisin jospar­laý ju­mystaryn qosymsha py­syq­tap, mundaıda óńirlerdiń erek­shelik­terin, halyq sanyn, aýrý-syrqaýlar qurylymy men salany da­mytýdyń basym­dyq­taryn eske­rýdi tapsyrdy. Vedomstvoǵa ýáki­letti memle­ket­tik organdarmen birlesip jeke medısınany damytý boıynsha jumystardy jandandyrý, medısınalyq mekemelerdiń qurylys jumystaryna qatysty sanıtarlyq normalar men ere­jelerdi jeńildetý, densaýlyq saq­taý salasyn retteý sharalaryn qabyldaý, medısınalyq ınfra­qu­rylymdy jańǵyrtý aıasynda den­saýlyq saqtaý nysandarynyń qurylysyna arnalǵan tıptik jobalar­dy qurý máselelerin pysyqtaý tapsyryldy.

Dınara BITIKOVA,
«Egemen Qazaqstan»