Laplandııalyq Santa-Klaýs kórmede júr

Fınlıandııanyń ulttyq kúnine arnalǵan saltanatty mereke eki eldiń Ánurandaryn oryndaýmen ashyldy. Sodan keıin sahnaǵa elimizdiń Energetıka mınıstri Qanat Bozymbaev shyǵyp, quttyqtaý sóz sóıledi. «Fınlıandııa – jasyl tehnologııa jóninde álemde kósh bastap kele jatqan elderdiń biri. Taza energııa salasyndaǵy sizderdiń qol jetkizgen jańa tehnologııalaryńyz úlgi tutýǵa turady. Fınlıandııa saıası-áleýmettik turǵydan berik turaqtylyǵymen úlgi kórsetip, Eýropalyq odaq elderi ishinde halyqtyń turmys deńgeıiniń joǵarylyǵymen tanylyp otyr. Bizdiń elimizde ótip jatqan EKSPO-2017 kórmesine qatysýǵa alǵashqylardyń biri bolyp nıet bildirgen Fınlıandııa Respýblıkasyna biz árdaıym qurmetpen qaraımyz. Kórme aıasyndaǵy sizderdiń ulttyq kúnderińiz respýblıkanyń táýelsizdik alǵanyna 100 jyl tolýymen tuspa-tus kelýinde de sımvolıkalyq mán bar. Fınlıandııa Qazaqstannyń táýelsizdigin tanyǵan alǵashqy memleketterdiń biri retinde jedel yntymaqtastyq baılanystar ornatty. Salystyrmaly túrde qysqa ýaqyt ishinde eki el arasyndaǵy dıplomatııalyq, ekonomıkalyq, áleý­mettik, yntymaqtastyq baı­la­nystar eń joǵary sapalyq deń­geıge shyqty. Jańǵyrmaly ener­getıka salasynda Qazaqstannyń birqatar kásiporyndary Fınlıandııa tehnologııasy boıynsha jumys isteıdi. Aldaǵy ýaqytta bul baǵyt­taǵy yntymaqtastyq baılanysy­myz keńı túspek», dedi óz sózinde Qanat Bozymbaev. 
Fınlıandııa Respýblıkasynyń prezıdenti Saýlı Nıınıstıo qazaq­stan­dyqtardy Ortalyq Azııada tuń­ǵysh ret EKSPO kórmesin ótki­zip otyrǵan bıik bedelderimen qut­tyq­tady. Mundaı jahandyq jaýap­kershilikti kez kelgen memlekettiń atqara almaıtyndyǵyn aıta kelip, ol EKSPO-2017 kórmesin ót­kizý­diń joǵary dárejede uıym­dastyrylǵandyǵyn atap kór­setti. Odan ári Saýlı Nıınıstıo eki el arasyndaǵy shynaıy dostyq ynty­maqtastyqty tilge tıek etip, Qazaqstan Ortalyq Azııa elderi ishinde Fınlıandııanyń eń basty saýda seriktesi ekendigin aıtty. 
«Bıyl biz óz elimizdiń táýelsiz­dik alǵanyna 100 jyl tolǵan torqaly toıyn toılaımyz. Búginde Fınlıandııa óziniń ekonomıkalyq, áleýmettik áleýeti jaǵynan, saıası turaqtylyǵy jaǵynan Eýropada kósh bastap otyrǵan elderdiń biri. Bizdiń halqymyzdyń sapaly da joǵary turmys jaǵdaıy álemge áıgili. Fınlıandııa men Qazaqstan Res­pýb­lıkasynyń arasynda dıplo­matııalyq baılanystar ornaǵa­nyna shırek ǵasyrdan asty. Osy ýaqyt ishinde biz táýelsiz Qazaqstannyń zor jetistikterine tánti bolyp kelemiz. Búginde Qazaqstan BUU Qaýip­siz­dik Keńesiniń turaqty emes múshesi retinde adamzat bolashaǵy­nyń sheshýshi máselelerine qatys­ty birshama ıgi bastamalarǵa uıyt­qy bolyp otyr. Sırııadaǵy alańda­tar­lyq jaǵdaılarǵa baılanysty araaǵaıyndyq tanytyp, qarsylas jaqtardyń kelissóz júrgizýine Astana alańyn berýdiń ózi Qazaq­stannyń beıbitsúıgish saıasaty­nyń qanshalyqty joǵary ekendi­gin kórsetedi. Osyndaı ıgi bastama­lar­dyń uıytqysy bolyp otyrǵan Prezıdent Nursultan Nazarbaevtyń halyqaralyq dárejedegi bedeliniń erekshe zor ekendigine tánti bolamyz. Astanadaǵy EKSPO-2017 kórmesine Fınlıandııanyń iri de tanymal 72 kompanııasy qatysýda. Olar jańǵyrmaly energetıka salasyn damytý maqsatyndaǵy qol jetken jetistikterin osy kórmede pash etedi. Fınlıandııa bilim berýdiń álemdegi eń ozyq úlgisin jasady. Osy kórme aıasynda biz bul saladaǵy jetistikterimizben de bólisemiz», dedi Fınlıandııa Respýblıkasynyń prezıdenti ulttyq kúnniń ashylý saltanatynda. 
Fınlıandııa Respýblıkasynyń ulttyq kúniniń ashylýyna oraı­las ótken saltanatty jıyn Fın­lıan­­dııadan arnaıy kelgen óner sheberleriniń konsertine ulas­ty. Sodan keıin sahnaǵa Fınlıan­dııa elindegi eń belgili adam Laplan­dııadan kelgen Santa-Klaýs shyqty. Fınlıandııa halqy Ioýlýpýkkı dep ataıtyn Santa-Klaýs EKSPO-2017 kórmesine arnaıy at basyn tirep, úsh kún boıy fınderdiń pavılonyna kelgen qonaqtardy qurmetpen qar­sy alatyn bolady. Santa-Klaýs­tyń búgingi qurmetti qonaqtary EKSPO-2017 halyqaralyq maman­dandyrylǵan kórmesine arnaıy kelgen Qazaqstan jáne Fınlıandııa Respýblıkalarynyń prezıdentteri boldy. 
 

Ashat RAIQUL,

"Egemen Qazaqstan"