Qyrkúıek aıyna deıin ERG kásiporyndarynyń 6500 qyzmetkeri osyndaı sharaǵa qatysyp, top quramyndaǵy mekemelerdiń keleshegin aıqyndaýǵa atsalysady. Olardyń qatarynda óndiris ozattary, shejireli eńbek áýletteriniń ókilderi, salaǵa eńbegi sińgen jáne tájirıbeli jumysshylar, eńbek ardagerleri men joǵary bilikti jáne jas ta belsendi mamandar bar. «ERG kásiporyndaryndaǵy jumysshy kadrlar quramy turaqty tolyqtyrylýy úshin kadrlyq qamtamasyz etýdiń keshendi júıesi jolǵa qoıylǵan. Ol mektep túlekterin kásibı baǵdarlaýdan bastap, oqý oryndarymen maman daıarlaý isindegi áriptestikke ulasyp, kásiporyndarda jumysshy mamandar daıarlaý, kásiporyndardaǵy jas mamandardy beıimdeý júıesine deıingi satylardy tolyq qamtıdy. Biz búgin odan ári ilgerilep – jeke korporatıvtik akademııa jobasyn júzege asyrýǵa kiristik. Topta sońǵy bes jylda, orta eseppen jylyna 27 myń adam oqytylyp keledi. Bul kompanııa kásiporyndarynda eńbek etip júrgen ujymnyń teń jartysyna jýyqtaıdy. Osy ýaqyt aralyǵynda ERG bul maqsattarǵa 2,6 mlrd teńgeden astam ınvestısııa quıdy», deıdi Eýrazııalyq toptyń kadrlyq esep, oqytý jáne personaldy damytý departamentiniń dırektory Lıdııa Bendıýk.
«Komandalyq jaz-2017» baǵdarlamasy aıasyndaǵy sharalar tek oqytýmen shektelmeı, EKSPO-2017 kórmesin aralaýdy da qamtıdy. О́ıtkeni, Elbasy Nursultan Nazarbaev kórmeni birinshi kezekte elimizdiń ár túkpirinen keletin otandastarymyz tamashalaýy kerektigin basa aıtqan. «Aldaǵy úsh aı ishinde áriptesterimniń Astanaǵa kelip, halyqaralyq jıynnyń kýási bola alatyny erekshe qýantady. Olar munda álemdegi ozyq sheshimdermen, tyń ınnovasııalarmen tanysady. Kompanııa qyzmetkerlerdi issaparǵa jiberý, jatyn orny men tamaqtanýyn, kórmedegi ózge de shyǵyndardy moınyna aldy. О́ıtkeni, adamdar – bizdiń basty aktıvimiz. Eýrazııalyq top olardy jan-jaqty damýǵa, elimizdiń ómirine belsendi aralasýǵa barynsha yntalandyrady», deıdi toptyń personal jáne áleýmettik jumys jónindegi basqarýshy dırektory Irına Dáýletbaqova.
Ashat RAIQUL,
«Egemen Qazaqstan»
