Uzyn-sonar keptelekten, kóliktiń shýynan sharshaǵan qala halqynyń keıde bir aýyq tynysh jermen jaıaý júrgendi jany qalap-aq turatyny bar. Qazir Almatyda turǵyndarǵa jaıly bolý úshin burynǵy saıabaqtar men gúlzarlar qaıta árlenip, janyna jaıaý júrginshi joldary salynyp, jappaı qaıta sándelip jasalyp jatyr.
Oǵan velojoldar jarysa qatarlasyp, buǵan deıin shynaıy kórinisterdi qalqalap turǵan túrli qorshaýlar, qaqpalar, retsiz salynǵan qabyrǵa-dýaldar alyp tehnıkanyń kúshimen súrilip tastaldy. Qalanyń qaı buryshyna barsańyz da dál osyndaı is-qımyl áreketterdi baıqaısyz. Bir sózben aıtqanda, Almaty búgin qaıta túleýde.
Qala ákimi Baýyrjan Baıbektiń sońǵy ótkizgen kóshpeli jıyndy shahardaǵy jaıaý júrginshi joldaryna arnaýy da tekten tek emes. Basqosýdan keıin belgili bolǵanyndaı, osy jazda Almatyda 16 jaıaý júrginshi joly jańadan paıdalanýǵa beriledi. Atap aıtqanda, qazirdiń ózinde Panfılov, Jibek joly, Gogol, Qabanbaı batyr kósheleri men Astana alańynyń aınalasyndaǵy júrginshiler joly jańasha sıpatta bastan-aıaq ózgerdi. Qalanyń Almaly aýdanyndaǵy Dúısenov kóshesinen Qaıdar kóshesine deıin, Qarasaı batyr men Abylaı han dańǵylynan Masanchı kóshesine, Esentaı ózeninen Baıtursynov kóshesine deıin uzyndyǵy 2,5 shaqyrym jer túgeldeı qaıta jańǵyryp kógaldandyrylady. Burynǵy tozyǵy jetken kósheler qala turǵyndarynyń kóz aldynda jańalanyp, sulý shahardyń sánin odan saıyn keltirip, shyraıyn asha tústi.
Qazir jaz aıy. Kanıkýl keldi. Aýladaǵy bıyl jańasha jasaý-sánimen túrlengen balalar alańdary erteli-kesh jas óskinniń kúmis kúlkisine shomylyp, abyr-sabyr, dý-dýman. Aınalaǵa sán bergen qońyr salqyn sýburqaqtar shahardyń tynysyn ashqanda, eriksiz «Pa, shirkin!..» deısiń. Alataýdan urǵan taý samalyn aıtsańshy! Jaıaý júrgiń-aq kelip turady...
Talǵat SÚIINBAI,
«Egemen Qazaqstan»
ALMATY
