«Memleket basshysy EKSPO-2017 kórmesi aıasynda Astana mańynda etnoaýyl men ekoaýyldan turatyn beldeý qurýdy usynǵan bolatyn. Osy maqsat aıasynda biz de nazarlaryńyzǵa ulttyq salt-dástúrimizdiń ómirsheń úlgisin usynyp otyrmyz. Mine, búgin kemeńger babamyz Qorqyt atanyń basynda osyndaı etnoaýyldyń ashylýy jáne aldaǵy ýaqytta onyń jumysymen kóptegen sheteldik týrısterdiń tanysýy Syr eliniń mártebesin bıiktetedi. Búgingi qýanysh – táýelsizdiktiń, Elbasynyń eren eńbeginiń jemisi. Búgingi mereke – Qorqyt babadaı abyzdyń asyl armanynyń aqıqatqa aınalǵanynyń belgisi», dedi aımaq basshysy Q.Kósherbaev.
Syr elinen 75 myńǵa jýyq adam Halyqaralyq EKSPO-2017 kórmesin tamashalaý maqsatynda Astanaǵa barýdy josparlap otyr. Oblys boıynsha 250 ardagerge, 2900 áleýmettik az qamtylǵan otbasylardyń balalaryna tegin joldama berildi. Sondaı-aq, oblys ákiminiń qabyldaýynda bolǵan halyqaralyq, respýblıkalyq pándik olımpıada jáne ǵylymı joba konkýrstarynyń 48 jas jeńimpazdaryna kórme bıletteri syıǵa tartyldy.
Esterińizge sala keteıik, «Qorqyt ata» memorıaldy kesheni men «Baıqońyr» ǵarysh kesheni halyqaralyq kórmeniń týrıstik baǵytyna engen.
