«О́zbekstanda tuńǵysh ret ótip otyrǵan bul sharaǵa Astana, Almaty, Aqtaý, Aqtóbe, Qaraǵandy, Qyzylorda, Pavlodar, Semeı, Taraz, Túrkistan, Shymkent qalalarynan 37 joǵary oqý orny qatysty. Kórme jumysynyń nátıjesinde О́zbekstan qazaqtarynyń 1300-ge tarta ókili jańa oqý jylynda qazaqstandyq joǵary oqý oryndarynyń stýdenti atanýǵa qyzyǵýshylyq bildirdi. Olardyń arasynda Qazaqstan men Ortalyq Azııa ǵana emes, kúlli TMD aýmaǵynda teńdesi joq Qazaq memlekettik qyzdar pedagogıkalyq ýnıversıteti de bar. Bul joǵary oqý ornyn 27 kolledj bitirýshisi tańdady», deıdi О́zbekstandaǵy respýblıkalyq qazaq ulttyq mádenı ortalyǵynyń bilim jáne ǵylym bólimi tóraǵasynyń orynbasary Klara Sadyrbaeva.
K.Sadyrbaevanyń aıtýynsha, qazaqstandyq joǵary oqý oryndaryn tańdaǵan О́zbekstan qazaqtarynyń sany munymen shektelmeıdi. Aldaǵy ýaqytta olardyń qatary Qazaqstandaǵy daıyndyq bóliminde oqyp jatqandar jastardan bólek, óz betimen kelip qujat tapsyrýshylar esebinen de tolyǵa túsýi múmkin.
О́zbekstannyń Naýaı oblysy qazaqtarynyń ulttyq-mádenı ortalyǵyna kóp jyldan beri jetekshilik etip kele jatqan K.Sadyrbaevanyń sózine qaraǵanda, mundaı bilim kórmesin taıaýda Taraz memlekettik pedagogıkalyq ýnıversıteti Naýaı oblysynda ótkizýdi josparlap otyr. Resmı statıstıka boıynsha bul aımaqta 57 myń qazaq turady. Atalǵan aımaqta 71 qazaq mektebi jumys isteıdi.
«Oqýshylar óz bilimin jalǵastyrý kezinde túrli kedergilerge tap bolýda. Máselen, olar áli kúnge deıin Qazaqstanda jalpy bilim beretin mekemelerge de, joǵary oqý ornyna da birden túse almaıdy. Bul úshin aldymen kolledj bitirýi kerek. Al kórshi elde kóp jaǵdaıda ana tilinde bilim alý múmkindigi shekteýli. Naýaı oblysy sııaqty keıbir aımaqtarda birde-bir qazaq kolledji joq. Bul máseleden Qazaqstannyń Bilim jáne ǵylym mınıstrligi de, О́zbekstandaǵy Qazaqstan elshiligi de habardar», deıdi Klara Sadyrbaeva.
Erlik ERJANULY,
jýrnalıst
ALMATY
