Jedel izdestirý sharalary bir mezgilde Qaztalov jáne oǵan kórshiles birneshe aýdanda qatar ótkizilgen. Qaztalov aýylynyń ózinde 15 nysan tintilgen. «Brakonerler bultartpas aıǵaqtarmen ustaldy» deıdi polısııa qyzmetkerleri. Áttegenaıy, «qyzyl kitapqa» engen kıeli janýardy qyryp júrgen qylmystyq toptyń quramynda aýmaqtyq «Ohotzooprom» mekemesiniń bas ınspektory da bolýy múmkin degen kúmán bar. «Qasqyrǵa qoı baqtyrý» degen osyndaı-aq bolar.
Tintý barysynda 272 dana kıik múıizi tabylyp, bes myltyq, 1 gazdy tapansha, 134 dana oq-dári tárkilengen. Brakonerlerdiń arsenalynan birneshe dúrbi, ańshy pyshaǵynyń neshe túri, júzine qan qatqan aralar, 18 uıaly telefon, tyǵýly birneshe avtokólik nómiri tabyldy. Eńgezerdeı «Toıota Land Krýzer-100» kóliginiń úsheýi, «Mıtsýbıshı Montero Sport» jáne «Reno Daster» kóligi, 1 mln 120 myń teńge aqsha alyndy. Jedel izdestirý sharalary kezinde «Aqbolat» qystaýynyń mańynan atylyp, múıizi kesilgen 3 kıik denesi tabylǵan.
Ázirge belgilisi, top quramyndaǵy 5 adam anyqtalǵan. Onyń ekeýi Qaztalovtaǵy ýaqytsha ustaý ızolıatoryna qamalǵan. Basqa da kúdiktilerdiń qylmysqa qatysy tekserilýde.
Aıta keteıik, Aqtóbe men Torǵaı dalasyndaǵy byltyrǵy qyrǵynnan keıin Qazaqstanda aqbóken sany kúrt azaıyp ketti. «Búginde elimizde nebári 100 myńnan sál asatyn kıik qalsa, onyń 70 paıyzy Batys Qazaqstan oblysy aýmaǵynda» deıdi mamandar.
Osydan biraz buryn óńirdegi quqyq qyzmetkerleri zańsyz kıik aýlaý faktileriniń jıilep ketkenin aıtyp, dabyl kótergen edi. Quqyq qorǵaý organdarynyń dereginshe, sońǵy úsh jyl ishinde kıiktiń 248 ushasy, 1117 múıizi alynyp, 558 kıik atylyp alynǵany anyqtalǵan.
Eń soraqysy, qylmysty quryqtaýy tıis tártip saqshylarynyń ózderi de ońaı oljaǵa ketári emes bolyp tur. Kıik múıizine qatysty qylmyspen tergeýshi D.Muqanov ustalyp, «polısııa maıory» sheninen aırylyp, 2 jyl 6 aıǵa bostandyǵy shektelip sottaldy. О́tken jyldyń 14-qarasha kúni tańǵy saǵat 7-de Bókeı ordasy aýdany Saraljyn aýyldyq okrýgi aýmaǵynan «Ohotozooprom» ınspektorlary toqtatqan 820DVA07 nómirli «Nıva» avtokóliginen aqbókenniń 7 tekesi men 2 eshkisi shyqty, osy kólikte Bókeı ordasy aýdandyq IIB ýchaskelik ınspektory D.Áshimov bolǵan!
Zańsyz kıik aýlaýshylarǵa qoldanylatyn zańnyń solqyldaqtyǵy da kópten áńgime bolyp kele jatyr. Qolǵa túsken qylmyskerler kóbine aıyppulmen, shartty jazamen qutylady. Al Qaztalovta tutqyndalǵan búgingi top múshelerine eń qatań jaza berilse, 7 jylǵa deıin bas bostandyǵynan aıyrylýy múmkin deıdi mamandar. Ony ýaqyt kórsetedi.
Qazbek QUTTYMURATULY,
"Egemen Qazaqstan"
Batys Qazaqstan oblysy
Sýretter operasııa kezinde túsirilgen beınejazbadan alyndy
