Bul festıvalge Qytaı Halyq Respýblıkasynan, Reseı Federasııasynyń Astrahan qalasynan, óz elimizdiń Shymkent, Qaraǵandy, Qostanaı, Qyzylorda, Aqtóbe, Atyraý oblystarynan jáne Batys Qazaqstan oblysynan 21 úmitker qatysyp jatyr. Festıvaldiń maqsaty – Eskendir aǵamyzdyń ánderin nasıhattaýmen birge qazaq ulttyq estrada oryndaýshylarynyń sheberlik deńgeıin kóterý, talantty jastardyń ónerine jol ashý. Án festıvaliniń qazylar alqasy tóraǵasy Eskendir Hasanǵalıev aǵamyzdyń ózi bolsa, alqa quramynda QR Eńbek sińirgen qaıratkeri, QR Tuńǵysh Prezıdent qory syılyǵynyń laýreaty, ánshi-kompozıtor, Chaıkovskıı atyndaǵy Almaty mýzykalyq kolledjiniń dırektory Birjan Hasanǵalıev, QR eńbek sińirgen artısi, Ǵ.Qurmanǵalıev atyndaǵy Batys Qazaqstan oblystyq fılarmonııa ánshisi Qanatqalı Qojaqov, «Eren eńbegi úshin» medaliniń ıegeri, Halyqaralyq, respýblıkalyq baıqaýlardyń Ǵ.Qurmanǵalıev atyndaǵy Batys Qazaqstan oblystyq fılarmonııa ánshisi Marat Sarbópeev, Eskendir Hasanǵalıev atyndaǵy Halyqaralyq «Atameken» án festıvaliniń jáne halyqaralyq, respýblıkalyq baıqaýlardyń laýreaty Nurjan Tasbolatov, «Eren eńbegi úshin» medaliniń ıegeri, Eskendir Hasanǵalıev atyndaǵy Halyqaralyq «Atameken» án festıvaliniń laýreaty, Ǵ.Qurmanǵalıev atyndaǵy Batys Qazaqstan oblystyq fılarmonııa ánshisi Jańylsyn Hasanova, QR Mádenıet salasynyń úzdigi, Qazaqstan Jýrnalıster Odaǵynyń múshesi, Batys Qazaqstan oblystyq mádenıet, arhıvter jáne qujattama basqarmasynyń bólim basshysy Sáýle Karabalına bar. Festıvaldiń ashylý saltanaty Oral qalalyq saıabaqta ótti. Barabanshylardyń bastaýymen úmitkerler sahna tórine kóterildi. «Atameken» ánimen ashylǵan jerebe tastaý rásiminde qazylar alqasynyń múshesi Birjan Hasanǵalıev quttyqtaý sóz sóılep, úmitkerlerge sáttilik tiledi. Odan ári úmitkerler «Qyzǵaldaqtar» bı ansamblimen birge flesh-mob bılep, «Atameken» emblemasyna óz qoltańbasyn qaldyryp, túrli-tústi sharlar ushyryldy.
Án alamanynyń ashylý saltanaty men I kezeńi oblystyq qazaq drama teatrynda 21 maýsym kúni saǵat 14.00-de bastaldy. Keshte festıval ıesi Eskendir Hasanǵalıev pen uly Birjannyń «Aýylym - ánim» shyǵarmashylyq konserti ótýde.
Al 22 maýsym kúni festıvaldiń II kezeńi qorytyndylanyp, IH Halyqaralyq «Atameken» án festıvaliniń jeńimpazdaryn marapattaý rásimi jáne Gala konsert ótedi.
Qazbek QUTTYMURATULY,
"Egemen Qazaqstan"
Oral
