Oblystyq Tótenshe jaǵdaılar jónindegi departament ókilderi ótkizgen brıfıngte joǵarydaı mysaldar keltirilip, aıtyp kelmes ajaldyń sebep-saldarlaryna taldaý jasaldy. Departament bastyǵynyń orynbasary Erik Sarybaevtyń aıtýynsha, adam ólimine jeteleıtin qasiret, eń aldymen, jeke bas qaýipsizdigine nemquraıdy qaraýdan týyndaıtyn kórinedi. Ásirese, mas kúıinde sýǵa túsý oqıǵalary azaımaı tur. Ol búkil ólim-jitimniń 70 paıyzyn quraıtyn bolsa, ata-analardyń balalardy qaraýsyz qaldyryp ketýinen bolatyn qaıǵyly jaǵdaılar 10 paıyz tóńireginde. О́mirmen mezgilsiz qosh aıtysqandardyń 65 paıyzy 18 ben 58 jas aralyǵyndaǵylar.
О́ńirde 2390 ózen, kól, taǵy basqa toǵandar baryn, olardyń 231-i sharýashylyq maqsattarǵa qoldanylatynyn, 51 jerde jurtshylyqtyń jazǵy demalys oryndary, 17 saýyqtyrý lagerleri uıymdastyrylǵanyn eskersek, saqtyq jumystaryn kúsheıtý, ony keshendi túrde júrgizý asa mańyzdy ekeni brıfıngte atap kórsetildi. Osyǵan oraı turǵyndardyń jaz kúnderin esh alańsyz ótkizýin qamtamasyz etýge júzge jýyq qutqarý quraldary men súńgýirler jumyldyrylǵan. Jedel-qutqarý otrıadtary kúni boıy kezekshilik etip, asa qaýipti aımaqtardy udaıy baqylaıdy. Sýǵa túsý erejelerin túsindirýmen júıeli aınalysady.
О́mir ESQALI,
«Egemen Qazaqstan»
Soltústik Qazaqstan oblysy
