Jarnama qyzmetindegi másele shash etekten

Otyrysqa Májilis basshysy Nurlan Nyǵmatýlın tóraǵalyq etti. Onyń ishinde qyzý talqylanǵany Ulttyq ekonomıka mınıstri Tımýr Súleımenov tanystyrǵan «Qazaqstan Respýblıkasynyń keıbir zańnamalyq aktilerine jarnama máseleleri boıynsha ózgerister men tolyqtyrýlar engizý týraly» zań jobasy boldy.

Depýtattar jalpy otyrys aıasynda talqylap, birinshi oqy­lymda maquldaǵan qujattyń biri – «Memlekettik aýdıt jáne qar­jy­lyq baqylaý týraly» Zańǵa ózge­ris­ter men tolyqtyrýlar engizý týraly» zań jobasy boldy. Taqy­ryp­qa qatysty negizgi baıandamany Májilis depýtaty Omarhan О́ksikbaev, al qosymsha baıandamany Qarjy jáne bıýdjet komıtetiniń múshesi Qojahan Jabaǵıev jasady. Bul qujat memlekettik aýdıt jú­ıesin odan ári jetildirýdi kózdeıdi.
«Memlekettik organdardyń jáne kvazımemlekettik sektor sýbek­tileriniń qyzmetin baǵalaý negizin­de memleket qarajaty men mem­le­kettiń aktıvterin paıdalaný men bas­qarýdyń tıimdiligin odan ári art­tyrýǵa yqpal etetin quqyqtyq tetik jaqsardy. Júrgizilgen tek­serý­lerdiń qorytyndylary boıynsha jaýaptylyq kúsheıtildi jáne usynymdar ınstıtýty engi­zildi. Bular memlekettik aýdıtor­lardy kásibılendirýdiń kelesi kezeńi bolyp tabylady», dedi depýtat O.О́ksikbaev.
Baıandamashynyń sózine qara­ǵanda, zań jobasyn ázirleýshi­lerdiń jumys tobyna 40-tan astam usynys kelip túsken. Onyń bári de múddeli mınıstrlikter men tıisti vedomstvolar arasynda qyzý talqylanyp, laıyqty sheshimder qabyldanǵan.
Otyrysta «Qazaqstan Respýb­­lı­kasynyń keıbir zańnamalyq aktilerine jarnama máseleleri boıynsha ózgerister men tolyqtyrýlar engizý týraly» zań jobasy birin­shi oqylymda qyzý ári uzaq talqy­lanyp, maquldandy. Sebebi, Máji­lis Tóraǵasynyń aıtýynsha, elimiz­degi jarnama qyzmeti salasynda sheshimin tappaǵan máseleler shash­ etekten kórinedi.
«Búgingi tańda bizdiń elimizde jarnama ornalastyrýdyń tár­tibi 17 normatıvtik akt arqyly rettelýi kóp nárseni ańǵartsa kerek. Osy­ǵan súıengen jergilikti atqarý­shy organ­dardyń árqaısysy óz betimen áreket ete otyryp, túıindi tıimdi sheship jatqan­daı kórinedi. Alaıda, is júzinde olaı emes. Máselen, salyqshy­lar LED-ekran men jarnama­lyq bannerdiń aıyrmasy joq dep sanap, tólemdi teń esepteı­di. Sol sııaqty respýblıkalyq mańy­zy bar jol jıegindegi jarnama­lardyń barlyǵynda memlekettik sıpatqa tán mańyz joq, júıesiz ornalastyrylǵan. Sondyqtan da bul salaǵa aýqymdy jańashyldyqtar men temirdeı tártip ornatý sózsiz qajet», dedi N.Nyǵmatýlın.
Ulttyq ekonomıka mınıstri tanystyrǵan zań jobasy jarnama qyzmetin memlekettik retteý­di júıeleýge jáne jarnama sala­syndaǵy, onyń ishinde túrli zań buzýshylyqtarǵa jol bermeý bóligindegi zańnamany jetil­dirýge baǵyttalǵan eken. Mınıstr­diń túsindirýinshe, jarnama qyzmetin memlekettik retteýdi júıeleý sheńberinde jarnama salasyndaǵy ýákiletti organ men jarnama sala­syn­daǵy retteýshi memlekettik organdardy anyqtaý kózdelýde. 
«Sondyqtan da, zań jobasynda aýmaqtardy abattandyrý tártibine uqsas jarnama sala­syn­daǵy ýákilet­ti organ­nyń syrt­qy (kórneki) jarnamany eldi meken­derde ashyq keńis­tikte orna­lastyrýdyń úlgilik qaǵı­da­laryn bekitýdi maqsat etip otyrmyz. Sondaı-aq, áleýmettik jarnamany keńinen taratý arqyly qoǵamnyń adamgershilik-mádenı tárbıesiniń deńgeıin arttyrý, eldiń ımıdjdik saıasatyn ilgeriletý úshin ony kúsheıtý maqsatynda, zań jobasynda mindetti tele-radıo arnalar úshin bir aı ishinde beriletin habarlardyń jalpy kóleminiń keminde 1 paıyzy mólsherinde óteýsiz negizde áleýmettik jarnamany ornalastyrý boıynsha talap engiziletin bolady», dedi T.Súleımenov. 
Aıta keteıik, daýysqa salý nátı­jesinde biraýyzdan maqul­danǵan atalǵan zań jobasynda Qazaqstan Respýblıkasynyń 5 kodek­si men 9 zańyna ózgerister men to­lyqtyrýlar engizý kózdeledi.

Nurlybek DOSYBAI,
«Egemen Qazaqstan»