Jıyndy ashqan Pavlodar oblystyq QHA tóraǵasynyń orynbasary Seısenbaı Jetpisbaev Elbasynyń atalǵan maqalasy qoǵamǵa úlken oı salǵanyn sóz ete kelip, «Arǵy-bergi kezeńderdegi rýhty dúnıelerimizdi túgendeıtin amanattaı ataly sózderdi aıta kele, Memleket basshysy bizdiń aldymyzda turǵan kóptegen mindetterdi atady. Bul mindetter latyn álipbıine kóshý, týǵan elge, jerge qyzmet etý, álemdik deńgeıdegi bilimge umtylý, taǵy basqa mańyzdy máselelerge tikeleı baılanysty. Sondyqtan, Elbasy atap kórsetken elimizge qajetti isterdi atqarý – siz ben bizdiń qolymyzda, – dedi.
Budan keıin jergilikti zııaly qaýym ókilderi, muǵalimder, kitaphanashylar, ǵalymdar, Assambleıa músheleri qatysqan bul basqosýǵa arnaıy kelgen qalamgerler Israıl Saparbaı men Marat Toqashbaev sóz sóıledi. О́z kezeginde aqyn Israıl Saparbaı Elbasynyń rýhanı mazmuny baı maqalasynyń dál ýaqytynda jazylǵanyn, ony birneshe ret oqyp shyqqanyn jetkizdi. Onyń aıtýynsha, maqalanyń túpki maqsaty – qoǵamnyń rýhanı sanasyn jańǵyrta otyryp, el damýyn jańa sapalyq bıikke kóterý.
– Ultyn súıip, ult taǵdyryn óz taǵdyrymen baılanystyratyn árbir azamat Elbasy maqalasynda aıtylǵan mindetterdi atqarýǵa daıyn dep oılaımyn. Ultymyzdyń XXI ǵasyrdaǵy rýhanı jańǵyrý strategııasy atanǵan Elbasynyń baǵdarlamasy eldik múdde úshin qajet. Ekonomıkamyzdyń damýymen qatar, qoǵamdyq sanamyz da óse tússe, rýhanı jańǵyrý degenimiz osy, – dedi Israıl Saparbaı.
Aqyn ultymyzdyń erekshelikteri jóninde áńgimelep, dúnıejúziniń rýhanı tájirıbelerinen de mysaldar keltire otyryp, maqalanyń búgingi kúngi urpaqqa aıtar oıynyń mańyzdylyǵyn sóz etti.
Al jazýshy, jýrnalıst Marat Toqashbaev qazaqstandyqtardyń álemdik bilim men ǵylymnyń bıik deńgeıine kóterilýiniń ári rýhanı oıaý bolýynyń mańyzdylyǵyna toqtaldy.
– Ata-babadan kele jatqan uly rýhy saqtalǵan, irgesi myqty eldiń ul-qyzyn ósirip, jetkizý bárimizdiń basty armanymyz. Al qazaqtyǵymyzdy saqtap qalý úshin osy rýh, rýhanı jańǵyrý sanamyzda turýy shart. Elbasy maqalasynda aıtylǵandaı, áýeli salt-sanany jańǵyrtý kerek, – dedi Marat Toqashbaev.
Jıyn barysynda jınalǵan jurtshylyq elimizge tanymal aqyn Israıl Saparbaev pen jazýshy, jýrnalıst Marat Toqashbaevtyń ádebı-rýhanı, tanymdyq áńgimeleri arqyly ózderiniń kókeılerindegi kóptegen suraqtarǵa jaýap alǵandaı boldy.
– Búgin mán-maǵynaly, keń tynysty kezdesýge kýá bolyp otyrmyz. Elge tanymal azamattar tushymdy oılaryn, qoǵamdy tolǵandyrǵan máselelerdi qozǵaı bildi. Negizinde, elge tanymal jýrnalısterdiń, aqyn-jazýshylardyń aýyl-qalalardy aralap, jurtshylyqpen kezdesip, Elbasy maqalasyn túsindirý boıynsha saparlap júrgenderi úshin rızamyz. Aldaǵy ýaqytta da osyndaı saparlardyń uıymdastyrylǵany jón. О́ıtkeni, bul rýhanı jańǵyrý úshin kerek, – deıdi jergilikti «Qazaq tili» qoǵamynyń tóraǵasy Sosıal Áıtenov.
Oblysqa belgili jýrnalıst Iýrıı Pomınov bolsa, Elbasynyń maqalasyndaǵy «Týǵan jer» baǵdarlamasy ózine sonshalyqty qymbat ekenin, ózin elimizdiń patrıoty sanaıtynyn, týyp-ósken osy óńirdegi Jelezınka aýdany jaıly óleńder, oblys týraly kóptegen estelikter jazatynyn jetkizdi.
Jıyn barysynda basqa da birqatar azamattar sóz sóılep, Elbasy maqalasynda sóz bolǵan máselelerge baılanysty jergilikti jerlerde atqarylyp jatqan ıgi isterge toqtaldy ári óz usynystaryn bildirdi. Máselen, M.Demesinov degen aqsaqal jer-sý ataýlarynyń baıyrǵy tarıhı atýlaryna qaıta oraltý «Týǵan jer» baǵdarlamasyna qosqan úlken úles bolar edi degen oıyn jetkizdi.
Farıda BYQAI,
«Egemen Qazaqstan»
Pavlodar oblysy
