Keshe EKSPO-2017 halyqaralyq kórmesiniń qalashyǵy Fransııanyń ulttyq kúnin atap ótti.
Merekelik sharanyń birinshi bóliminde Syrtqy ister mınıstrligi Eýropa departamentiniń dırektory Aıgúl Quspan sóz sóılep, Qazaqstan pen Fransııanyń strategııalyq áriptester ekenin eske saldy. Qos memleket qoıan-qoltyq jumys jasap, qazirgi zamannyń syn-tegeýrinderine, onyń ishinde ǵalamdyq jylynýǵa qarsy áreket etip jatqanyn aıtty. «EKSPO-2017 halyqaralyq kórmesiniń taqyryby – «Bolashaq energııasy». Bul uzaq merzimge arnalǵan sheshimderdi, tehnologııalyq ınnovasııany usynady. Fransııa, bul turǵyda, ekologııalyq jaýapkershiliktiń úlgisi. Jańartylǵan energııa kózin paıdalanýda fransýzdyq eń úzdik tájirıbeler – adamzattyń baǵa jetpes qundylyǵy. Men EKSPO-2017 halyqaralyq kórmesi Eıfel munarasy sııaqty tanymal bolady degen úmittemin», dedi A.Quspan.
Jıynda Fransııa pavılonynyń bas komıssary Paskal Loro qos el arasyndaǵy dostyqty joǵary baǵalady. «Fransııa men Qazaqstan – dos memleketter. Bizdiń elimiz Qazaqstanmen 2008 jyly strategııalyq áriptestik týraly kelisimge qol qoıdy. Fransııa óz kezeginde energetıka salasyndaǵy tájirıbelerimen bólise alady. Sondyqtan búgin osy jerde elimizdiń eń iri kásiporyndarynyń jáne energetıka salasynda jańa tehnologııalardy damytqysy keletin shaǵyn jáne orta kásiporyn ókilderi bar», dedi ol. Bas komıssar halyqaralyq sharaǵa Fransııanyń qandaı jobalarmen kelgenderin áńgimeledi.
«Bizdiń pavılonymyzda birneshe taqyryptaǵy jobalar qoıylǵan. Birinshi qabat – aqyldy qalalar boıynsha. Biz óz qalamyzda jaqsy turý úshin ne isteýimiz kerek? Al ekinshi joba ekologııalyq kólikpen baılanysty. Bizde taza energııany qoldanatyn qandaı kólikti jasap shyǵarýǵa bolady? Sondyqtan «Peugeot» kompanııasy gıbrıdavtomobıldi alyp keldi. Kólik jartylaı benzınmen jartylaı elektroenergııamen jumys isteıdi», dedi Paskal Loro.
Merekelik sharanyń ekinshi bóliminde fransýzdyq ártister ónerlerin kórsetti. Ásirese, «Le hall de la Chanson» mýzykalyq toby shyrqaǵan ásem ánder qazaqstandyqtardyń kóńilin kóterdi. Al «AÝET» sırkiniń ártisteri qoıǵan kórinis kórermenderdi eriksiz Parıj kóshelerinde júrgendeı áserge bóledi.
«Biz óz qoıylymymyzda sırktiń tehnıkasyn qoldanamyz. Biraq osy nómirimizde Parıj kóshelerindegi kórinisterdi beınelegimiz keldi. Mysaly, shaǵyn kafe, ofısıant, ánshiler. Bul ıdeıamyzdy osy jerde júzege asyrýǵa tyrystyq. Aldaǵy ýaqytta áli 10 qoıylym qoıamyz», dedi sırk ókili Olıver Landre.
