«Mıras» oblystyq mádenıet saraıyna tańerteńnen kelgen balalardyń qarasy kóp boldy. 7 men 13 jas aralyǵyndaǵy ár balanyń sońynda ata-ana jáne tálimgeri, mekteptegi ustazdary júr. Boıynda ánshilik ónerdiń ushqyny bar ár bala baıqaýda jeńimpaz bolaryna bek senimdi.
«Bala daýysy» ulttyq balalar án baıqaýyna oblystyń barlyq shalǵaıynan 110 kishkentaı talapker qatysyp, baǵyn synady. Balalar men jasóspirimderdiń belgili ánshilerdiń oryndaýyna eliktep-solyqtaıtyn kezi, sondyqtan olardyń arasynan tabıǵı jańa daýysty tabý da ońaı emes eken. Birinshi irikteýden 19 ul men qyz ótti. Tústen keıin olardy baıqaýdyń Qostanaı oblysy boıynsha juldyzdy tálimgeri Medeý Arynbaev ózi tyńdap, án dodasyna Jitiqara qalasynan kelip qatysqan 8 jasar Iаsmın Aıýpovany jeńimpaz dep tanydy. Aıýpova 4 jasynan qaladaǵy balalar shyǵarmashylyǵy mektebinde vokalmen aınalysady. Onyń syrtynda bı úıirmesine qatysady, fortepıanoda oınaıdy.
– Jalpy, balalar arasyndaǵy qandaı jarys bolsa da, jeńimpazdy tańdaý qıyn. Onyń ústine birinen-biri ótetin talantty balalardan tańdaý jasaý eki ese kúrdeli der edim. Irikteý fınalynda meniń tańdaýym Iаsmın Aıýpovaǵa tústi. Segiz jasar balǵyn qyz – naǵyz tabıǵı daryn. Maǵan kishkentaı ánshiniń ándi shynaıylyqpen oryndaıtyn, eshkimdi qaıtalamaıtyn daralyǵy unady. Men óz tańdaýyma rızamyn. Endi baıqaýdyń fınalyna deıin tek daıyndyq jumystary ǵana kútip tur,–dedi Medeý Arynbaev.
Baıqaýdyń irikteý týry balalaryn óner báıgesine qosqan ata-analarǵa da, ustazdarǵa da unady. Ádil qorytyndy shyqty. О́ner daryndylardy unatady. Mundaı baıqaý bolashaqta kim kóringenniń sahnada júrip, qazaq ániniń berekesin ketirýge toqtaý bolary sózsiz.
Názıra JÁRIMBETOVA,
«Egemen Qazaqstan»
QOSTANAI
