Qazaqstannyń depozıtterge kepildik berý qory bekitken, teńgemen syıaqy mólsherlemesiniń usynylǵan eń joǵary jyldyq 14 paıyzdyq deńgeıi ózgerissiz qalady. Bul týraly jýrnalısterdiń salymdar boıynsha mólsherlemelerdiń josparly ózgerýi týraly suraǵyna jaýap bere otyryp QR Ulttyq bankiniń tóraǵasy Danııar Aqyshev habarlady. Aqyshevtyń aıtýynsha, depozıtter boıynsha paıyzdyq mólsherleme eldegi ınflıasııa deńgeıine, bankterdegi ótimdilik jaǵdaıyna, eldegi makroekonomıkalyq ahýalǵa, sondaı-aq bankterdiń shyǵystary men táýekelderine qaraı qalyptasady. "Depozıtter boıynsha mólsherlemelerdiń tómendep jatqanyn baıqap otyrmyz jáne biz mundaı prosesti quptaımyz, - dedi ol. - Bank sektorynda ótimdiliktiń qolaıly jaǵdaıy saqtalǵan, sondaı-aq ınflıasııalyq prosester tómendegen jaǵdaıda, depozıtter boıynsha mólsherlemeler odan ári tómendeýi múmkin. QDKQ "shekti mólsherdi" belgiledi, odan joǵary kóterýge bolmaıdy, tómen túskenin qoldaımyz".
Sondaı-aq, Aqyshev aqparattyq agenttikterdiń redaktorlarymen ótken kezdesýde qaıtarymsyz depozıtter taqyrybyn da qozǵady. "Kez kelgen depozıt talap etkenge deıingi depozıt bolyp tabylady. QR Azamattyq Kodeksine sáıkes kez kelgen bank 3 kún ishinde salymshyǵa depozıtti qaıtarýǵa mindetti. Bul norma bank pen salymshy arasyndaǵy ózara qarym-qatynasty aıtarlyqtaı ornyqsyz etedi", - dep sanaıdy Aqyshev, sonymen birge ol, qazirgi ýaqytta Ulttyq Bank ekinshi deńgeıdegi banktermen talqylaýdy eskere otyryp, qarajatyn merziminen buryn almaý talabymen bankke jańadan qarajat salýǵa daıyn salymshylar úshin yńǵaıly qaıtarymsyz depozıtter engizýdiń ońtaıly úlgisi jónindegi máseleni pysyqtap jatqanyn da atap ótti. Bul salymdardy olardyń merzimi aıaqtalmaıynsha alýǵa bolmaıtynyn, biraq osyndaı shekteý úshin syıaqy mólsheri de joǵary bolatynyn bildiredi.
"Ol úshin zańnamanyń keıbir normalaryn aýystyrý qajet. Qandaı depozıt tańdaıtynyn salymshy ózi sheshýge tıis, biraq qaıtarymsyz depozıtterdi engizýdiń qoldanystaǵy depozıtterge qatysy bolmaıdy. Qaıtarymsyz depozıtter boıynsha mólsherleme men kepildik berilgen soma joǵary bolýǵa tıis. Osy máselelerdi biz talqylaýdamyz jáne osy jobany iske asyrýǵa tujyrymdamalyq turǵydan daıynbyz", - dedi Aqyshev.
Ol álemdik praktıkada salymshylarǵa aqsha qarajatyn anaǵurlym tartymdy kiristilikpen, qosymsha qorǵaý tetikterimen uzaq merzimge jınaqtaý múmkindigin berý qaıtarymsyz depozıtterdiń negizgi artyqshylyqtary bolyp tabylatynyn atap ótti. "Sonymen birge bankter úshin mundaı quraldyń bolýy neǵurlym ornyqty qorlandyrý bazasynyń qalyptasýyna, ótimdilik táýekelin tómendetýge jáne uzaq merzimdi perspektıvaǵa kredıtteýge yqpal etetin bolady", - dep málimdedi Danııar Aqyshev.
