8 mlrd teńge «ATFBankke», 2 mlrd teńge «Nurbankke» salyndy. Talap boıynsha bankter parıtetti túrde qarjy bólýi kerek. Iаǵnı eki bank osy somaǵa teń qarjy shyǵarady. Osylaısha «Damý-О́ńirler III» baǵdarlamasyna bólingen qarjynyń jalpy kólemi 20 mlrd teńgege jetti.
Nesıe «Bıznestiń jol kartasy-2020» bıznesti qoldaý men damytýdyń birińǵaı baǵdarlamasy aıasynda júzege asyrylyp jatqan jobalarǵa beriledi.
«Damý-О́ńirler» baǵdarlamasy boıynsha nesıe alǵan kásipkerler sýbsıdııa túrindegi qosymsha jeńildikti de paıdalanyp, paıyzdyq mólsherlemeni 7-10 paıyzǵa arzandata alady. Al kepil múlki bolmaǵan nemese jetispegen jaǵdaıda «Damý» Qory nesıe somasynyń 85 paıyzyna deıin kepildik beredi.
Qarjylandyrý talaptary tómendeı. Nesıe boıynsha nomınaldy syıaqy mólsherlemesi «ATFBank» AQ arqyly – jylyna 14%. «Nurbank» arqyly – jylyna 17,5%. Bir kásipkerdiń qolyna merzimi 84 aıǵa deıin 500 mln teńgege deıin beriledi;
Nesıeleýge agroónekásiptik keshender, taý-ken óndirisi, qurylys materıaldaryn shyǵarý, metallýrgııa, metallóńdeý, mashına qurylysy, kólik jáne qoımada saqtaý, týrızm, aqparat jáne baılanys salalary, sondaı-aq kásibı, ǵylymı jáne tehnıkalyq qyzmet túrleri men densaýlyq saqtaý jáne áleýmettik, bilim berý, óner, kóńil kóterý jáne demalys pen basqa da qyzmet túrleri kiredi.
Bul baǵdarlamalardy júzege asyrý aıasynda búgingi kúni 3 134 kásipker nesıe alyp,11 375 jańa jumys oryndary ashylyp, naqty berilgen qarajat 175 mlrd teńgege jetti.
Aınash ESALI,
«Egemen Qazaqstan».
ALMATY
