Sársenbi kúni Qazaqstannyń jergilikti basylymdarynda jarııalanǵan el Úkimetiniń qaýlysyna saı, Qazaqstan astanasyndaǵy halyqaralyq áýejaıdyń aty ózgertilip, qazirgi Memleket basshysy Nursultan Nazarbaevtyń atymen atalatyn boldy.
El Prezıdenti memlekettiń qalyptasýy men damýynda erekshe rólge ıe. Jergilikti basylymdardyń habarlaýynsha, Qazaqstannyń qoǵam jáne memleket qaıratkerleri atalǵan sheshimdi quptap otyr. Parlament depýtattarynyń pikirinshe, Úkimettiń bul qaýlysy resmı qujat túrinde shyqqanymen, halyqtyń usynysy retinde qabyldanýda.
Aıta keteıik, bul áýejaı taıaýda ǵana jańa termınalmen tolyǵyp, bıyl EKSPO halyqaralyq mamandandyrylǵan kórmesin ótkizý ústindegi Astana óńirdiń tranzıttik habyna aınalyp otyr.
Úkimettiń áýejaı atyn Prezıdenttiń esimimen ataý týraly qaýlysynan keıin eldiń qoǵam qaıratkerleri bul týraly kópshiliktiń atynan jergilikti buqaralyq aqparat quraldaryna pikir bildirdi. Olardyń aıtýynsha, nysannyń atyn memleket basyndaǵy adamnyń qurmetine ataý álemniń kóptegen elinde bar tájirıbe. Oǵan qosa, burynǵy keńestik rejim kezinde «Selınograd» dep oryssha atalǵan qazirgi Astanadaǵy áýejaıdyń kody áli kúnge sol eski atymen atalyp, ıaǵnı TSE kodymen belgilenip júr. Kópshiliktiń pikirinshe, jańa ataýdy paıdalana otyryp, eski kod ta alynyp tastalýy tıis. О́z kezeginde úkimettegiler bul pikirmen kelisip otyr. Ázirge jańa kod naqty bekitilmegenimen, quziretti mekemeler birneshe nusqasyn daıyndap qoıǵan.
Úkimettiń áýejaı atyn aýystyrý týraly qaýlysyna jergilikti halyq qoldaý bildirip jatyr. Jalpy, Qazaqstan Prezıdentiniń ózi ádette mundaı bastamalardy qoldaı qoımaıdy. Máselen, osydan bir jyl shamasy buryn el Parlamentiniń depýtattary el astanasynyń atyn «Nursultan» nemese «Nazarbaev» dep ataý týraly usynys bildirgen edi. Degenmen, Memleket basshysy muny orynsyz dep taýyp, kelisimin bermegen bolatyn.
Taıaýda ǵana jańa termınalmen tolyqqan bul áýejaı Eýrazııa keńistiginde jolaýshylar habyna aınalyp otyr. Úkimettiń eldi tranzıttik memleket etý maqsatynda qolǵa alǵan jumystary nátıjesinde Qazaqstan birneshe elmen vıza rejimin alyp tastasa, Astana men Almaty áýejaılary Eýropa men Azııanyń arasyndaǵy tranzıttik kópir retinde óz áleýetin arttyra túsýde.
Daıyndaǵan
Baýyrjan MUQANOV,
«Egemen Qazaqstan»
