Ashylý saltanatynda alǵash bolyp sóz alǵan Qazaqstan Respýblıkasynyń Memlekettik hatshysy Gúlshara Ábdiqalyqova forýmǵa qatysýshylarǵa Prezıdent Nursultan Nazarbaevtyń quttyqtaý hatyn oqyp berdi. Onyń aıtýynsha, Prezıdent medıa forým tek jýrnalıstik ortada emes, jahandyq problematıkany sheshý jolynda da tabysty jumys atqaryp keletinin jazǵan.
""Álem dramalyq ózgeristerdi basynan ótkerip jatqan qazirgi zamanǵy jaǵdaıda osyndaı dıalog alańdarynyń qajettiligi artyp keledi. Álemdik kontekste basqa kózqarastarǵa qurmetpen qaraıtyn tek ashyq dıalog qana mıllıondaǵan adamdardyń ózekti problemalaryn sheshý úshin jahandyq senimdi qalpyna keltirý baǵdary bolady. Buqaralyq aqparat quraldary osy prosestiń kóshbasshysy bolýy tıis jáne óziniń kúsh-jigerin jańa kedergilerdi qoıýǵa emes, kerisinshe, halyqtar men elderdi biriktirýge shoǵyrlandyrýy kerek. Álem jańa aqparattyq ortany qalyptastyrý dáýirine aıaq basty. Biz seriktestik pen bilim almasýdy yntalandyrýy úshin qolymyzdan kelgenshe áreket etýimiz qajet", - dep atap ótilgen Memleket basshysynyń sózinde.
.jpg)
Prezıdent 15 jyldyń ishinde Eýrazııa medıa forýmy laıyqty bedelge ıe bolǵanyn jetkizdi. "Sonymen qatar aldaǵy áleýmettik jáne tehnologııalyq ózgeristerge daıyndyq turaqty damýdyń aıqyndaýshy faktory bolady. Osyǵan baılanysty Forýmnyń kún tártibine tehnologııalyq tártiptiń ózgerýinde negizgi baǵyty retinde "jasyl" ekonomıka máseleleriniń engizilýi sımvoldyq mánge ıe. Bul óz kezeginde, Astanada ótip jatqan EKSPO-2017 kórmesiniń taqyrybyna úndes", - dep atap ótken Elbasy.
Esterińizge sala ketsek, EAMF 2002 jyly Darıǵa Nazarbaevanyń bastamasymen beısaıası ári kommersııalyq emes uıym retinde quryldy. Forým Batys pen Shyǵysty tolǵandyratyn kókeıkesti máselelerdi ashyq talqylaýǵa baǵyttalǵan. Atalǵan is-shara jyl saıyn álemniń 60-tan astam memleketinen halyqaralyq jáne qazaqstandyq BAQ ókilderin, saıasatkerler men sarapshylaryn bir alańǵa jınap keledi. XIV Eýrazııalyq medıa forýmnyń kún tártibinde "Bolashaqtyń energııasy", "Jańa álemdik tártip", "Azııa "ekonoımkalyq keremet" qupııasy", "Sırııa daǵdarysy", "Sıfrlyq revolıýsııa" taqyryptary talqylanbaq. Forýmǵa Túrkııanyń eks-prezıdenti Abdýlla Gúl, Eýropalyq komıssııanyń eks-prezıdenti Joze Manýel Barrozý, «Russia Today» telearnasynyń júrgizýshisi Sofıko Shevardnadze, «The Futures Agency» basshysy (Shveısarııa) Gerd Leonard, CNN telekompanııasynyń vıse-prezıdenti (Ulybrıtanııa) Greg Beıchman, Nobel syılyǵynyń laýreaty Radjendra Pachaýrı, AQSh-tyń BUU-daǵy burynǵy elshisi Bıll Rıchardson, Qazaqstan tarapynan Aqparat jáne kommýnıkasııalar mınıstri Dáýren Abaev, "Astana" halyqaralyq qarjy ortalyǵynyń basshysy Qaırat Kelimbetov, Syrtqy ister mınıstri Qaırat Ábdirahmanov jáne basqa da belgili saıasatkerler men sarapshylar qatysýda.
Gúlnur Qýanyshbekqyzy,
"Egemen Qazaqstan"
Sýretterdi túsirgen Orynbaı Balmurat,
"Egemen Qazaqstan"
