Memleket basshysy usynysymen Dúnıejúzi qazaqtary qaýymdastyǵynyń Tóralqa tóraǵasynyń birinshi orynbasary bolyp Zaýytbek Turysbek saılandy.
«Endi biz Tóraǵanyń birinshi orynbasaryn saılaýymyz kerek. Janymda otyrǵan Talǵat Mamashev 2004 jyldan bastap atqaryp keledi. Biraz jumys isteldi. Talǵat Asylulynyń jemisti jumysy úshin rızashylyǵymdy bildirip, rahmet aıtamyn. Syrttaǵy otandastarymyzben rýhanı-mádenı baılanystar nyǵaıa tústi. Men endi osy orynǵa Zaýytbek Turysbekovti usynǵym keledi. Táýelsizdik jyldar ishinde meniń tapsyrmammen talaı jaýapty qyzmetter atqardy. Ysylǵan, tájirıbeli. Jalpy syrttaǵy aǵaıynnyń ómir súrýi men júris-turysymen jete tanys Eń negizgisi - qandastarymyz eń kóp turatyn Reseı men О́zbekstanda Elshi boldy. Olardyń jaǵdaıyn jaqsy biledi», – degen Prezıdent kópshilik daýysqa saldy. Quryltaı delegattary Zaýytbek Turysbekovtiń kandıdatýrasyn biraýyzdan qoldap daýys berdi.
«Úlken senimge kóp rahmet. Bul qyzmet ár qazaqqa bólek dúnıe. Men kóp sóılemeımin, is bilemin. Erteńgi kúni barynsha ispen dáleldeımin»,– dedi Tóraǵanyń jańa birinshi orynbasary Zaýytbek Turysbek.
Esterińizge sala ketsek, 2004 jyly Qazaqstan Respýblıkasynyń Prezıdenti, Dúnıejúzi qazaqtary qaýymdastyǵynyń Tóralqa tóraǵasy N.Á.Nazarbaevtyń sheshimimen Qaýymdastyq Tóralqa tóraǵasynyń birinshi orynbasary mindeti T.A.Mamashevqa júktelgen bolatyn.
Zaýytbek Qaýysbekuly Turysbekov 1951 jyly 15 jeltoqsanda Ońtústik Qazaqstan oblysy Túlkibas aýdanynda dúnıege kelgen. Qazaq hımııa-tehnologııalyq ınstıtýtyn jáne Almaty joǵary partııa mektebin bitirgen.
1993-1997 jyldary Ońtústik Qazaqstan oblysynyń ákimi, 1997 jylǵy jeltoqsannan - QR Kóshi-qon jáne demografııa agenttiginiń tóraǵasy, 1999 jylǵy qańtardan - QR Prezıdenti Ákimshiligi basshysynyń orynbasary - QR Prezıdenti Ákimshiligi Uıymdastyrý-baqylaý bóliminiń meńgerýshisi, 2000 jyldan - QR Memlekettik qyzmet isteri agenttiginiń tóraǵasy, 2003 jyldan - QR ishki ister mınıstri. 2005 jyldan QR Memlekettik qyzmet isteri agenttiginiń tóraǵasy, 2007 jyldan - QR-nyń О́zbekstandaǵy Tótenshe jáne О́kiletti elshisi, 2009 jylǵy tamyzdan - QR-nyń Reseıdegi Tótenshe jáne О́kiletti elshisi, 2012 jylǵy sáýirden QR-nyń Ýkraınadaǵy Tótenshe jáne О́kiletti elshisi, QR-nyń Moldova Respbýlıkasyndaǵy tótenshe jáne О́kiletti elshisi qyzmetin qosa atqarýshy boldy.
Aıa О́mirtaı,
«Egemen Qazaqstan»
