Aıta keteıik, búginde oblys boıynsha elektr qýatyna jalpy qajettilik ortasha 400 MVt saǵatty quraıdy. Onyń 30 paıyzy ishki kózder esebinen óndirilse, 70 paıyzy elimizdiń soltústik óńirlerinen tasymaldanady. Aǵymdaǵy jyly Shymkent qalasynda «Bozaryq», «Astana 1,2» qosalqy stansalarynyń qurylysyn aıaqtaý josparlanyp otyr. Nátıjesinde qaladaǵy ónerkásip oryndary men 425 myń turǵyn sapaly elektr energııasymen qamtamasyz etilmek.
Budan bólek, 7 qosalqy stansanyń (Akjar, 1M1, 1M2, 2M1, 2M2, Novostroıka 1, 2) qurylysyn aıaqtaý kózdelýde. Bıyl sondaı-aq Saryaǵash aýdanynda 220/100/10 kV «Qyzylásker» qosalqy stansasynyń qurylysy bastalmaq. Bul maqsatqa 7,8 mlrd teńge baǵyttalady. Eger joba tolyǵymen iske assa, Saryaǵash, Maqtaaral, Shardara aýdandaryndaǵy 705 myń turǵyn men aýylsharýashylyq nysandary, ónerkásip oryndary úzilissiz, sapaly elektr energııasymen qamtamasyz etiledi. Iаǵnı, Maqtaaral, Saryaǵash, Shardara aýdandary ekonomıkasynyń ári qaraı damýyna qosymsha 50 MVt elektr energııasy paıda bolady.
Sonymen qatar, Ordabasy, Otyrar aýdandary men Arys qalasynyń aýmaǵynda ornalasatyn kásiporyndar men 244 myń turǵyndy turaqty elektr energııasymen qamtý maqsatynda «Badam» qosalqy stansasynyń jobasy ázirlenýde. Onyń qurylysy 2018 jyly bastalady.
Oblystyq Energetıka jáne turǵyn-úı kommýnaldyq sharýashylyq basqarmasy málimetine sáıkes, 2018 jyly bastaý alatyn Tóle bı aýdanyndaǵy «Alataý» qosalqy stansasynyń qurylysyna 938,9 mln teńge bólinip otyr. 2017 jyly qýattylyǵy 3,5 MVt-ty quraıtyn Qazyǵurt jáne Saıram aýdandaryndaǵy 2 shaǵyn sý elektr stansasynyń qurylysy aıaqtalyp, iske qosylady dep kútilýde.
Osy jobalardy iske asyrý arqyly elektr jelileriniń tozý deńgeıin 2017 jyly 55,7 paıyzdan 54,8 paıyzǵa, 2021 jyly 52,4 paıyzǵa tómendetý kózdelýde.
Buǵan qosa, bıyl Shymkent, Arys qalasy, Maqtaral, Qazyǵurt, Saryaǵash, Túlkibas, Tóle bı, Báıdibek aýdandarynda sapaly elektr qýatymen qamtamasyz etý maqsatynda jalpy 70 nysannyń jobalaý-smetalyq qujattary ázirlenýde. Sonymen qatar, «Ońtústik Qazaqstan oblysynyń elektr júıeleriniń 2030 jyldarǵa deıin damý shemasy» ázirlenýde.
