Saltanatty jıyn qyzmettik mindetin atqarý kezinde qaza tapqan polıseılerdiń eskertkishine gúl shoqtaryn qoıýmen ashyldy. Ár jyldarda qanshama polısııa qyzmetkeri qandyqol qylmyskerlerdiń qolynan qaza tapty. 2008 jyly polıseı Qaırat Jumabekov balalardy qutqarý úshin óz ǵumyryn qıǵan bolatyn. Jalǵan dúnıemen qosh aıtysqan tártip saqshylaryna aspanǵa úsh márte oq atyp, bir mınýt únsizdik jarııalaý arqyly qurmet kórsetildi.
«Bıyl biz kóptegen jumystardy atqardyq. Birneshe qalalar men aýdandarda ishki ister organdarynyń qyzmetkerlerine arnalǵan memorıaldyq taqtalar men áskerı dańq murajaılary ashyldy. Men óz atymnan atqarýshy organdar men depýtattyq korpýsqa kórsetken qoldaýlary úshin zor alǵys bildirgim keledi. Mereke qarsańynda oblys ákimi 103 mashınanyń kiltin tabystady» – dedi Qaraǵandy oblysy IID bastyǵy Mergenbaı Japparov óz sózinde. Sóz sońynda ol Qaraǵandy oblysy IID jeke quramy qoǵamdyq tártip pen azamattardyń qaýipsizdigin qamtamasyz etý úshin barlyq kúsh-jigerin salatynyn tilge tıek etti.
Mıras ASAN,
«Egemen Qazaqstan»
