Aıdar Sháribaev – Qazaqstan boks mektebiniń túlegi. Ekinshi jartylaı jeńil salmaqta óner kórsetetetin ol bir kezderi áýesqoı bokstan Qazaqstan ulttyq quramasy sapynda bolyp, san ret el chempıony atandy. Áýesqoı boksta 250 kezdesý ótkizgen. Osydan úsh jyl buryn kásipqoı boksqa oıysqan otty jigit, úlken sporttaǵy ónerin tabysty bastady. Az ýaqyt ishinde 6 jekpe-jek ótkizip, barlyǵynda jeńis tuǵyrynan kórindi. Onyń ishinde bes qarsylasyn nokaýtpen sulatty. Aıdar alǵash karerasyn bastaǵan tusta taǵy bir qazaqstandyq kásipqoı boksshy Qanat Islamnyń sparrıng-qarsylasy bolyp, onymen birge sheteldegi oqý-jattyǵý jıyndarynda qatar júrdi. Úlken sporttyń qyr-syryna qanyqqan azamattyń alǵashqy aıaq alysy búkilálemdik kásipqoı boks mamandarynyń nazaryna ilikti. Aıdar judyryqtasatyn salmaqta álem boıynsha 2020 bylǵary qolǵap sheberi bar desek, otandasymyz solardyń ishinde reıtıngktik kórsetkish boıynsha úzdik elýlikke taban tiregen.
Elimizde ótip jatqan EKSPO-2017 kórmesi aıasynda Aıdar WVA INTERCONTINENTAL tujyrymy boıynsha chempıondyq beldikke talasady. Atalmysh jekpe-jek tamyzdyń otyzy nemese qyrkúıek aıynyń toǵyzy kúni Astanada ótedi dep kútilýde. Jaýapty básekege tyńǵylyqty daıyndalyp, oqý-jattyǵý jıyndaryn ótkizý úshin Aıdar AQSh-qa attanady. Osyǵan oraı, Almatydaǵy «Aidar Classis» boks zalynda bylǵary qolǵap sheberimen jýrnalısterdiń kezdesýi ótti. Kezdesý barysynda sport jankúıerleri men jýrnalıster aldaǵy josparlanyp otyrǵan jekpe-jektiń barysy týraly boksshynyń óz aýzynan estip, Aıdardyń jattyǵý sátine kýá boldy. Qazaqstan kásipqoı boks federasııasynyń vıse-prezıdenti dańqty boksshy Vıktor Demıanenkoǵa kókeıde júrgen suraqtaryn qoıyp otandyq kásipqoı bokstyń jaı-kúıi jaıly mol aqparatqa qanyqty.
– Álem boıynsha eń tanymal sporttardyń biri kásipqoı boks bizdiń elimizde de tyń serpin alyp keledi. Qazirgi tańda 6 promoýterlik kompanııa jumysyn júrgizip, 40-qa jýyq sportshyǵa Qazaqstan kásipqoı boks federasııasynyń lısenzııasy berildi. Sháribaev úlken sporttaǵy mansabyn tabysty bastady. Ádette, boksshylar kem degende 20 kezdesýde jeńiske jetkennen keıin ǵana chempıondyq belbeýge talasady. Alaıda, Aıdardyń reıtıngi joǵary bolýyna baılanysty mamandar tarapynan zor senim artylyp otyr. Degenmen, bári qarjyǵa kelip tireledi. Aıdardyń promoýterleri jaǵdaı jasaı alsa, kórme kezinde keremet tartystyń kýási bolýymyz ábden múmkin. О́z basym Diamond Ring-ke senim artamyn. О́ıtkeni atalǵan proýmoterlik kompanııa jekpe-jek uıymdastyryp qana qoımaı, boksshylardy turaqty túrde oqý-jattyǵý jıyndaryna jiberip otyrady. Boks keshinde Qanat Islam, Janat Jaqııanov, Bekman Soılybaev, Isa Aqberbaev, Fırýza Sharıpova syndy boksshylar óner kórsetýge tıis, – deıdi Qazaqstan kásipqoı boks federasııasynyń vıse-prezıdenti Vıktor Demıanenko.
Aıdardyń chempıondyq beldikke talasatyn qarsylasynyń esimi ázirge belgisiz. Amerıkadaǵy jattyǵý barysynda ol sparrıng-qarsylas retinde Lıýk Kempbel jáne Iýrıorkýs Gamboa syndy Olımpıada chempıondarymen sheberlik shyńdap, belgili kýbalyq maman Osmırı Fernandestiń tálimin alatyn bolady. Bizde óz tarapymyzdan el namysyn arqalap júrgen azamatqa jeńisti joldyń jalǵana berýin tilep, shaıqaı ber, Sháribaev degimiz keledi.
Arman OKTIаBR,
«Egemen Qazaqstan»
ALMATY
