Bırfıng barysynda Baljıt Greval «Samuryq-Qazyna» AQ úsh negizgi maqsatyna (qorjyndyq kompanııalardyń qunyn arttyrý, el ekonomıkasyn jańǵyrtý jáne turaqty damý) jetý jolynda Qorda qolǵa alynǵan alty strategııalyq bastama týraly baıandady.
«Búgingi tańda Sovereign Wealth Fund Institute esebi boıynsha quny 67,4 mlrd AQSh dollaryna jetetin aktıvterdi ıelenýshi «Samuryq-Qazyna» AQ álemdik deńgeıdegi qorǵa aınalýǵa umtylýda. Desek te, bul uıym álemniń 30 iri táýelsiz qorynyń qataryna kiredi. Tıimdiliktiń taǵy bir mańyzdy kórsetkishi – ROE júıesi bolyp otyr. Sondyqtan da biz qazir kapıtalǵa qaıtarym boıynsha iri álemdik qorlardan ilgerimiz jáne ary qaraı da qarjylyq kórsetkishterimizdi jaqsarta túsýge múddelimiz», dedi B.Greval.
«Samuryq-Qazyna» AQ 2014 jyldan beri Halyqaralyq táýelsiz qorlar forýmynyń (IFSWF) múshesi bolyp tabylady. IFSWF músheleri quqyqtyq jáne ınstıtýsıonaldyq qyzmet aıasyn, sondaı-aq ınvestısııalar men táýekelderdi basqarý qurylymyn anyqtaıtyn 24 prınsıpti (Santıago prınsıpteri) negizge alady. Santıago ustanymdaryn oryndaý arqyly halyqaralyq qarjylyq naryqtarǵa táýelsiz ál-aýqat qorlaryndaǵy jumystyń durys atqarylyp jatqanyn, al ınvestısııalardyń oryndy ekonomıkalyq jáne qarjylyq sharttarǵa sáıkes júzege asyrylǵanyn kórsetý kózdelgen.
«Búgingi tańda «Samuryq-Qazyna» qorynyń qyzmeti Santıago prınsıpteriniń kóbine saı keledi. Ásirese, jarııalyqty qamtamasyz etý turǵysynan alǵanda bıylǵy jyldyń birinshi toqsanynda bizdiń kompanııa táýelsiz ál-aýqat qorlarynyń ishinde Linaburg-Maduell Transparency Index jarııalyq reıtınginde eń joǵarǵy 10 upaıdy ıelendi. Bedeldi reıtıng kórsetkishteriniń osyndaı deregine súıene otyryp, qarjylyq ınstıtýttar men táýelsiz qorlardyń ózge steıkholderleri (múddeli tulǵalary) naryq úshin qanshalyqty ashyq ári jarııaly ekenine kóz jetkizedi», dedi Quqyqtyq súıemeldeý jáne táýekelder jónindegi basqarýshy dırektory Ǵ.Bıtenov.
Al IFSWF strategııa jáne kommýnıkasııalar jónindegi dırektory Vıktorııa Barbarı bolsa, aldaǵy Táýelsiz qorlar forýmynyń otyrysy jaıynda aıtyp berdi.
«Forým otyrystaryn jyl saıyn ótkizýdiń maqsaty – eń ózekti máselelerdi talqylap, maqsat-mindetterdi sheshýdiń qoldanbaly tásilderi izdestirý. Shara aıasynda uıym músheleri ǵana qatysatyn jabyq kezdesýler men qonaqtar jáne BAQ ókilderi shaqyrylatyn ashyq paneldik sessııalar ótedi. Qazaqstandyq tilshiler úshin álemniń táýelsiz ál-aýqat qorlarynyń basshylaryna óz saýaldaryn joldaýǵa múmkindik bar», dedi ol.
Aıta keteıik, joǵaryda atap ótken Halyqaralyq táýelsiz ál-aýqat qorlarynyń forýmy – jalpy quny 3,5 trln AQSh dollaryn aktıvterin basqaratyn 31 eldiń 32 qory enetin uıym. Al «Samuryq-Qazyna» AQ bıylǵy jyldyń 5-7 qyrkúıek aralyǵynda uıymnyń jyl saıynǵy otyrysyn Astanada uıymdastyrady dep josparlanýda. Qazaqstan elordasynda táýelsiz qorlardyń basshylary turaqsyz álem naryqtarynda aktıvterdi úılestirý jáne táýekelderdi basqarý máselelerin, táýelsiz qorlar úshin ǵalamdyq ınvestısııalardyń bes jyldyq jospary jáne sandyq ekonomıkanyń basty kórinisterin talqylaıdy. Sonymen qatar qonaqtar nazaryna Qazaqstannyń ınvestısııalyq múmkindikteri usynylady dep kútilýde.
Nurlybek Dosybaı,
«Egemen Qazaqstan»
