Tús aýa «Azııa «ekonomıkalyq keremetiniń» qupııasy. Daǵdarys kezindegi turaqtylyq jáne álemdik naryqta kóshbasshylyqqa jetý joldary» taqyrybymen jalǵasyn tapqan alqaly keńestiń aralyq úzilisinde kitapty avtorlyq qoltańbamen syıǵa tartý sharasy uıymdastyryldy.
Álemdik saıasat sahnasynyń san qubylýy men megaqalalardyń damý prosesi jáne adamzat balasynyń órkenıetke qulash urý qarqynyn qulshyna zerttep, zerdelep júrgen úndi azamaty sııasy keppegen sý jańa kitabynyń tusaýkeser rásimin jas qala bolsa da, ataǵy alysqa ketken Astana shaharynda jasaýdy jón sanapty.
«Bul kitaptyń osy jylǵy Eýrazııalyq medıa forým qarsańynda jaryqqa shyǵýy ózindik úılesimin tapqan ıgi isterdiń biri boldy. Onyń ústine Astana qalasy Eýrazııa keńistiginde óte jas qala bolǵanymen, onyń damý deńgeıi álem jurtshylyǵynyń tańdanysyn týdyrýda. Máselen, Qazaqstan Prezıdentiniń syrtqy saıasattaǵy qaryshty qadamdary men memlekettiń halyqaralyq sheńberdegi sharalarǵa belsendi qatysyp, abyroı-bedeliniń asqaqtaýy jáne jerjahandy jańashyldyqqa bastaıtyn EKSPO-2017 kórmesiniń osy qalada ótýi – Astananyń jarqyn bolashaǵynyń kepilindeı bolyp kórinedi. Sonymen qatar, osyndaı joǵary deńgeıde uıymdastyrylǵan keremet basqosý aıasynda óz kitabymnyń oqyrmanǵa jol tartyp otyrǵanyna bek qýanyshtymyn», deıdi kitap avtory.
Shara aıasynda forým qatysýshylary megaqalalardyń álemdik saıasat sahnasyna áseri jáne zamanaýı aǵymǵa saı damýǵa jeteleıtin atalmysh kitapty zor qyzyǵýshylyqpen qabyl alyp jatty. О́ıtkeni, aǵylshyn tilinde Ulybrıtanııada basylyp shyqqan bul ádistemelik qural qalalar arqyly álemniń osy kúngi baǵyt-baǵdaryn baǵamdaıdy.
Nurlybek DOSYBAI,
«Egemen Qazaqstan»
