Aqtóbelikter áýeli óńir ereksheligi bolyp sanalatyn Qarahan, Aısha bıbi kesenelerine baryp, shahardaǵy birqatar bilim, medısına nysandarynda da boldy. Aqtóbe oblysynyń ákimi Berdibek Saparbaev bastaǵan delegasııa quramy eki kún boıy Áýlıeata jurtshylyǵyna óńir jetistikteri men erekshelikterin tanystyrdy. Sondaı-aq, Jambyl oblysynyń ákimi Kárim Kókirekbaev uly dalanyń ulaǵatty úni tunǵan tarıhı Taraz shaharynyń jáne jalpy Jambyl óńiriniń búgingi damý tarıhyn áńgimeledi.
О́z kezeginde eki oblys basshylary arnaıy jınalys ótkizip, ózara yntymaqtastyq pen óńiraralyq baılanysty keńeıtýdiń joldaryn qarastyrdy. Atap aıtsaq, jıyn barysynda eki óńirdiń kásipkerlik, bilim berý, densaýlyq saqtaý, mádenıet jáne sport sekildi bes baǵyt boıynsha tájirıbe almasý jaıy sóz boldy.
Aqtóbe kúnderiniń aıasynda Taraz turǵyndary men qonaqtary ortalyq stadıonǵa kelip, Aqtóbe men Taraz sport mektepteriniń tárbıelenýshileri arasyndaǵy fýtboldan joldastyq kezdesýdi tamashalady. Sondaı-aq, aqtóbelik sahna maıtalmandary Jambyl oblystyq qazaq drama teatrynda «Esigimdi qaqqan kim?» spektaklin sahnalap, kórermen kózaıymyna ıe boldy. Qoǵamdaǵy ótkir máselelerdi qozǵaǵan qoıylym kópshiliktiń kókeıine oı saldy. Al Aqtóbe oblysy balalarynyń tehnıkalyq shyǵarmashylyqtaǵy jetistikteriniń kórmesi ótip, robot tehnıkasynyń jetistikteri jáne taǵy da basqa jobalar usynyldy. Budan keıin Taraz qalasyndaǵy ortalyq «Dostyq» alańynda Aqtóbe qalasy men 12 aýdan kásipkerleriniń qatysýymen aýylsharýashylyq jármeńkesi uıymdastyryldy.
Aqtóbelikter jambyldyqtarǵa et, shujyq jáne konservi ónimderin, balyq, sút, ósimdik maıy, bal jáne ózge de azyq-túlik ónimderin bazar baǵasynan 8-15 paıyz arzan baǵaǵa usyndy. Jármeńkeden keıin Aqtóbe oblysynyń ákimi Berdibek Saparbaev Jambyl atyndaǵy «Rýhanııat» ortalyǵyna arnaıy kelip, nysannyń tynys-tirshiligimen tanysty. Ortalyq kórmelerin aralap, Áýlıeata óńirinen shyqqan Kenen Ázirbaev, Baýyrjan Momyshuly, Shona Smahanuly, Sherhan Murtaza, Ákim Tarazı, Myrzataı Joldasbekov, Kúlásh Ahmetova syndy ulttyq zııalylardyń ónegeli ómir jolyna toqtaldy. Al Jambyl oblysynyń ákimi Kárim Kókirekbaev «Jambyl atyndaǵy «Rýhanııat» ortalyǵy bizdiń zııaly qaýymmen kezdesip, rýhanı sharýalardy aqyldasatyn ornymyz. Bul jerde talaı-talaı tanymal tulǵalarymyz qonaqta bolǵan. Sondyqtan munyń bári ásirese jastarymyz úshin paıdaly dep oılaımyn» dedi.
Sondaı-aq, aqtóbelik delegasııa «Qazaq handyǵyna 550 jyl» monýmentine jáne «Kóne Taraz» tarıhı-mádenı kesheninde bolyp, óńirdiń sáýlet ónerin tamashalady.
Hamıt Esaman,
«Egemen Qazaqstan»
Jambyl oblysy
