Esep berýdiń birneshe rejımde ótkenin aıta ketý lázim. Zalǵa jınalǵan halyqtan tys ınternet arqyly jáne ár oblys ortalyqtarymen tikeleı onlaın baılanys ornaǵan jıynda halyqqa esep bergen mınıstr baıandamasynda salaǵa qatysty kóptegen máseleler tııanaqty qamtylyp, barlyq qoıylǵan saýaldarǵa naqty jaýaptar qaıtaryldy.
Máselen, mınıstr jyl saıynǵy vaksınasııadan bas tartatyn azamattar qatary az emestigin alǵa tartty. Halyqtyń basym bóligi vaksınasııany qoldaǵanymen, dinı kózqarastaryna baılanysty balalaryna ekpe salýdan bas tartatyndardyń kóbeıý úrdisiniń qaýiptiligine toqtaldy. Atap aıtqanda, sońǵy bes jyldyń ishinde ondaı azamattardyń sany 3 myńnan 9,7 myńǵa ósken kórinedi. Budan tys vaksınadan bas tartýdyń endigi bir sebebi retinde, BAQ arqyly taraǵan vaksınanyń sapasyna kúdiktendiretin jaǵymsyz aqparattyń áseri bolýda, degen ol sharaǵa qatysýshylarmen qatar ony onlaın rejımde tyńdap otyrǵan barlyq adamdardy vaksınasııa máselesine salǵyrt qaramaýǵa shaqyrdy, «Vaksınasııadan bas tartýdyń bala bolashaǵyna zııandy áserin esten shyǵarmańyzdar. Mınıstrlik vaksınasııa máselesin jan-jaqty túsindirip keledi. Soǵan qaramastan, ekpeden bas tartyp jatqandar az emes. Bul rette qoǵamdyq densaýlyqty saqtaý qyzmetteri osy jumyspen álde de tyǵyz aınalysýy qajet», dep atap kórsetti mınıstr.
О́mir súrý jasynyń uzarýyna, ana men bala óliminiń azaıýyna qatysty oń derekterdi sóıletken mınıstr sozylmaly naýqastarmen aýyratyn pasıentterge qatysty óte bir úlken máseleni basa aıtqan. Jedel járdem qyzmetine júgingenderdiń deregin jetkizgen mınıstr kóp jaǵdaıda shaqyrǵandardyń basym bóliginde aýrýdyń asqynyp ketýi tirkelgenin, turǵyndardyń óz densaýlyqtaryna jóndep qaramaı, saýyqtyrý sharalaryn jıyp qoıyp, aýyryp júrse de, emxanaǵa barmaıtynyn, sonyń saldarynan jedel járdem qyzmetine kóp salmaq túsetinin tilge tıek etti. Qońyraýlar kóbeıgen saıyn jedel járdemniń jumysy da qaýyrt bolady. Sodan baryp, jedel qyzmettiń kelip jetý ýaqyty da uzarady degen E.Birtanov damyǵan memleketterde jedel kómek 15 mınýtta jetse, bizde ol áli 31 mınýtty qurap otyrǵanyn jetkizdi. «Oryn alǵan bizdegi olqylyqtyń basty sebepterin aıttym. Al ony aýyzdyqtaý úshin biz jańa buıryqtyń jobasyn daıyndap qoıdyq. Onda jedel járdemniń naqty qyzmetteri kórsetiledi. Jedel járdem jedel qyzmetpen aınalysýy shart. Biz soǵan kelýimiz kerek», dedi ol.
Adamdar densaýlyǵynyń kúzetindegi taǵy bir qulaq túrerdeı jańalyq – áıelderge qatysty. Aıaǵy aýyr kelinshekterdiń tirkeýge ýaqytynda turmaýyna baılanysty arnaıy mobıldi qosymsha ázirlenip jatqanynan habardar etken mınıstr mobıldi qosymshanyń Qaraǵandy oblysynda pılottyq rejimde iske qosylǵanyn, al ony uıaly telefonǵa tegin júktep alýǵa bolatynyn jáne jyldyń aıaǵyna deıin taǵy birneshe aımaqta iske qosý kózdelip otyrǵanyn jetkizdi.
Zaldan qoıylǵan saýaldardyń birinde dárigerlerdiń dıagnoz qoıýdaǵy shalalyǵy sóz boldy. Oǵan jaýap bergen mınıstr dáriger mamandyǵyn tańdaǵan túlekterdiń bilimin joǵary oqý ornyn bitirgen kezde ǵana emes, oqý ýaqytynda da qatań baqylaýdy kózdeıtin máseleni qarastyryp jatqanyn aıtyp ótti. Bul úshin stýdentti birinshi-ekinshi kýrsty bitirgen soń jaqsylap turyp irikteý qajet. Bul – xalyqaralyq tájirıbede bar dúnıe. Sondyqtan, stýdentterdiń bilimin der kezinde anyqtaýdyń nátıjesinde JOO qabyrǵasynan saýatty da sapaly dáriger shyǵady. Sonymen qatar, dárigerlerdiń biliktiligin tekserý jumysy da kúsheıtiledi degen mınıstr gazetimizde kóterilgen másele, dıspanserlik eseptegi pasıentterge jyldyń basynda tegin dáriler bosatylýynyń tenderdiń keshigýine baılanysty qoldaryna tımeıtindigi jaıynda «Dárige baılanǵan ǵumyr» atty maqalaǵa qatysty naqty jaýap berdi. «Kóterilgen másele durys, bul jaıynda arnaıy zań qabyldanyp, kelesi jyldyń dárilerin satyp alý jumystary kúz aılarynan bastala bermek. Sonda jyldyń aıaǵynda qujattar tegis ázirlenip bolyp, dáriler bosatylýynda keshiktirý oryn almaıdy dep oılaımyz», degen jaýabyn berdi.
Anar TО́LEÝHANQYZY,
«Egemen Qazaqstan»
