– Jaqsylyqty jar sala aıtý da jaqsy emes, árıne. Dese de, sizdiń bastamańyzben qolǵa alynǵan ıgi ister eldiń yqylasyn oıatyp, alǵysyn alýda. Qarajattan qysylyp, qamyqqan jandarǵa kópten beri qolushyn sozyp júrsiz be?
– Alla jumyr basty pendesin kedeılikpen de, baılyqpen de synaıdy ǵoı. Qolymyzda bar dúnıe, aldymen Jaratqan bergen nesibeden, sodan keıin ǵana eńbegimizben bitkeni anyq. Sondyqtan, aınalamyzdaǵy aǵaıynnyń qınalǵanyna kóz juma qaraı almaımyz. Jalpy, kompanııanyń atynan 1995 jyldan beri qaıyrymdylyq sharalaryna qatysýdamyz. Sol kezden byltyrǵa deıin kómekke jaratqan qarajatymyzdyń jalpy esebi 37 mıllıonǵa jetipti. Ásirese, jetim balalarǵa, qarttar úıine, ardagerlerge kóbirek járdemdestik.
– Sońǵy ret elordadaǵy EKSPO kórmesine Jetisý jerinen 500 jetkinshekti ákeldińizder...
– Iá, Astanada uıymdastyrylyp otyrǵan, bul sharanyń mańyzy zor. Sol sebepti, muny elimizdiń árbir turǵyny tamashalasa, artyqtyq etpeıdi dep bilemin. Alaıda, kópshiligimizdiń oǵan múmkindigimiz bola bermeıtini taǵy ras. Osy oraıda, turmysy tómen, kóp balaly, materıaldyq jaǵynan az qamtylǵan otbasy balalaryna 500 bılet alyp bergendi jón kórdik. Shara bitkenshe taǵy da júz shaqty jetkinshekti jolpulymen, taǵam-sýsyndarymen, jatyn oryndarymen qamtyp, elordaǵa ákelsek degen oıymyz bar.
– Kópke sharapaty tıgen ózge sharýalaryńyzdan tam-tumdap aıta ketseńiz.
– Bıyldyqqa 600-ge jýyq otbasyna azyq-túlik paketterin usyndyq. Olardyń qataryndaǵy múmkindigi shekteýli jandar ózderine qajet protezderin suratsa, qarjylaı járdemdesýdi ótingenderge kerek somalaryn berdik. Budan bólek, boks, kúres, erejesiz jekpe-jek syndy sport túrlerinen Qazaqstan, Azııa chempıondaryna demeýshilik jasadyq.
Jumysshylarymyzdyń áleýmettik ahýalyn da nazardan tys qaldyrǵan emespiz. Olardyń ýaqytynda emdelýine, mereke kezderinde syıaqy alýyna, jalaqylaryn keshiktirmeýge barynsha kúsh salamyz. Memleket qazynasyna túsetin salyǵymyzdy da ýaqytynan keshiktirgen emespiz.
Oraıy kelgende maqtana salaıyn, osyndaı jáne ózge de qaıyrymdylyq sharalarymyzdy eskerse kerek, ótken jyly Almaty qalasy ákimdigi men «Nur Otan» partııasy fılıalynyń usynysymen «Altyn júrek» ulttyq qoǵamdyq syılyǵyn enshiledik. Basqa da kóptegen Alǵys hattarmen marapattalǵanymyz bar. Árıne, ıgilikti isterimizdi marapat alaıyq dep istemeımiz ǵoı, ony kóptiń baǵasy, rahmeti dep uqtyq.
– О́ndiris – el ekonomıkasynyń negizgi tiregi. Sońǵy jyldary memleket tarapynan osy salany qoldaý maqsatynda bólinetin qarajat ta eselep ósken. Elbasy Nursultan Nazarbaevtyń Qazaqstan halqyna arnalǵan Joldaýlarynda da shaǵyn jáne orta kásipkerlikti ilgeriletý, damytý máseleleri sóz bolyp, qarjylandyrý isin júıelendirý tapsyryldy. «Bıznestiń jol kartasy-2020» baǵdarlamasy – sózimizdiń naqty dáleli. Endi ózińiz basqaryp otyrǵan JShS jaıynda bilsek.
– «MetallPromGroup» JShS osydan segiz jyl buryn irge qalaǵan. Kompanııa birneshe jyl boıy joǵary sapaly bolat qorytyp qana qoımaı, otandyq shıkizatty paıdalanyp, metall ıleý naryǵynda ónimdi jumys istedi. Búginde sharýamyzdy jolǵa qoıyp, profıldi, sharshy jáne dóńgelek qubyrlar, profıldi tósem, buryshtaýshy krab, myryshtalǵan tegis jabyn, sylaq tory syndy, ásirese, qurylysqa qajet temir-tersekter óndiremiz.
Áý basta on adamnan turatyn ujym músheleri qazirgi tańda 130-ǵa jetti. Olardyń qatarynda on bes ulttyń ókili bar. Alǵashqy jyldary aı saıyn 500 tonna ónim óndiretin bolsaq, qazir 3500 tonnaǵa jetkizdik bul kórsetkishti. О́nimderimizdi Qazaqstannyń 13 qalasyna jiberemiz. Al shet memleketterden Qyrǵyzstan, Tájikstan jáne О́zbekstan respýblıkalaryna eksporttaımyz. Astanadaǵy EKSPO qalashyǵynyń qurylysyna jaraǵan metaldardyń birshamasy da bizdiń ónimderimiz.
Búgingi Qazaqstanda bızneske qoldaý joǵary ekeni ras. Erinbegen jan eselep tabys tabatynyna kúmánim kem. О́ıtkeni, Elbasymyz kásipkerliktiń qaı salasyna da keńinen jol ashyp qoıdy. Bizge osy múmkindikti barynsha paıdalaný qajet.
P.S. Sóz sońynda aıta keter bir jaıt, on tórt bala ósirip, tárbıelep otyrǵan Dolkýntaı Abdýlhalıl olardyń úsheýin balalar úıinen asyrap alǵan eken. Barlyǵyn teń dárejede baǵyp-qaǵyp, bilim alýlaryna jaǵdaı jasaýda. Osy isi de ózge qaltaly jandarǵa aıryqsha úlgi bolatyn qasıet. Zamandastarymyz saýapty sharýany jalǵaı ketse, qanekeı!..
Áńgimelesken Ashat RAIQUL,
«Egemen Qazaqstan»
