18 maýsym kúni túnde teńizge ketken Abylaı 22 maýsym kúni Mańǵystaý oblystyq aýrýhanasyna jetkiziledi. Alǵashynda jansaqtaý bólimine túsken jigittiń densaýlyǵy qazir jaqsy, aldaǵy aptada úıine qaıtýǵa daıyndalyp jatyr. Dárigerler jigitte gıpotermııa, ıaǵnı dene qyzýynyń 32 gradýsqa deıin tómendep ketkendigin, tamaq ishpegendikten álsiregendigin aıtady.
– Sýda júzip júrip tikushaqty, kemeni kórip aıqaıladym, biraq olar, árıne, meniń daýysymdy estigen joq. Tórtinshi kúni kemeni kórip, Qudaıdan tilek ettim. Kemege jetý úshin qansha júzdim, esimde joq. Esimdi keme ishinde jyıdym, – deıdi Abylaı.
Irandyq kemege tap bolǵan ony kemedegiler sý berip, qurǵaq kıim kıgizip, óz-ózine kelgen soń nebary 40 mınýt ishinde qazaqstandyq teńizshilerge tapsyrǵan. Jaǵalaýǵa kelgen boıda «Jedel járdem» shaqyrtyp, dereý aýrýhanaǵa jetkizilgen.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
